InfoHub Logo

Kóktem kelip, Jer-Ana býsanyp, tirshilikke jan bitken shaqta, ósimdikter birinen keıin biri gúldeı bastaıdy. Áýeli qar astynan báısheshek shyǵady. Odan soń, ózge ósimdikter, alma, jıde sıaqty aǵashtar da gúldeıdi. Báriniń de bir-aq maqsaty bar, ol — óz dánin shashý, ıaǵnı tóńirekke urpaǵyn taratý.

Al adamzat ózinshe oılaıdy. Qulpyryp turǵan gúldi óziniń súıikti adamyna syılaıdy. Aýyl balalary kóktemde qyp-qyzyl kilemdeı qulpyryp jatqan qyrǵa shyǵyp, qyzǵaldaq terip ákelip, ǵashyq bolǵan qyzdaryna syılaýshy edi. Qala adamdary qyzǵaldaq, raýshan, baqytgúl, lalagúl jáne basqa da gúl destelerin dúkennen satyp alyp, eń qymbat adamyna tartý etedi.

Gúldiń adam ómirinde alatyn róli óte joǵary desek, qatelespeıtin shyǵarmyz. Óıtkeni ǵashyq adamdar bir-birine degen súıispenshilik sezimin gúl syılaý arqyly bildiredi. Iaǵnı, gúl syılaý arqyly mıllıondaǵan adamdar óz syńaryn taýyp, otaý qurdy. Gúl — mahabbattyń dánekeri. Jáne sol jolda tamyrynan qıylǵan gúlder óz tuqymyn shasha almaı, qurban bolady.

Ǵajap gúlder toılarda, keshterde, týǵan kúnderde tartý etilgen adamǵa bir sáttik qýanysh syılaıdy. Áýeli úıdiń tórinde turady.  Syıǵa berilgen nebir ádemi gúlderdiń eki-úsh kúndik «ǵumyry» bolady. Odan keıin, ıá, odan keıin adamdar solyp qalǵan álgi gúldi dalaǵa shyǵaryp, kúl-qoqys salatyn jáshikke tastaıdy.

Gúlderdiń qysqa ǵumyry-aı!..

---