InfoHub Logo

Jalǵyz boz atynan basqa eshbir kóligi joq bir kedeı bolypty. Onyń jaıshylyqta buta artar, kóshkende júk artar kóligi de osy aty eken.

Ol bir kúni bar-joǵyn boz atyna artyp, kóship bara jatsa, bir aýylda qalyń adam jınalyp as berip, báıge qosyp, dyr-dýman bolyp jatypty. Olardyń tusynan álgi adam boz atyn jetektep ótip bara jatqanda, boz aty bir kúrsinip qalǵan eken, tartý arqany úzilip ketipti. Muny kórgen álgi kedeı: «E, janýar-aı, ishińde óneriń bar eken ǵoı, seniń de qaryzyńnan bir quty laıyn» dep júgin sol jerge túsirip tastap, attyń yńyrshaǵyn almastan, báıge bolyp jatqan aýylǵa barypty, oǵan eshkim qarap ta qoımapty. Tek attardy aıdaıtyn kezde kedeı: «Atymnyń arqasy jaıdaq minýge kelmeıdi, yńyrshaǵymen balam minip barady», — depti de qalyń júırikterdiń sońynan ilestirip jiberipti.

Báıge keledi-aý degen mezgilde aty barlar da, basqalar da kezeńge shyǵyp, shań kóringen jaqqa qaraýmen bolady. Biri ana at keledi dese, biri myna at keledi dep turǵanda, jalǵyz shyqqan boz at ekeni anyq bolady. Azdan soń basqa attardan kósh buryn yńyrshaǵyn súıretip boz at kelgen eken.

Ústindegi balasy jyǵylyp, yńyrshaǵymen kelgen atqa, jol boıynsha ekinshi báıge berilipti. Osydan bastap, bul kedeıdiń kúısiz kóligi — boz atqa arnalyp «yńyrshaqty boz» degen kúı shyǵarylǵan eken.

---