Jalǵyz kózdi áýlıe
Baıaǵy ótken zamanda bir asqan baıdyń bar jylqysyn jaý barymtalap alyp ketipti. Baı ne isterin bilmeı qaıǵyryp júrgende, bir áıel jolyǵypty:
— Baı-eke, jylqylaryńnyń jartysyn berseń, men malyńdy túgel qaıtaryp ákelem, — degen eken. Baı bul talapty qabyl alypty.
Al áıeldiń sondaǵy kúıeýi jalǵyz kózdi áýlıe eken. Sonyń jalǵyz qara aıǵyry bolypty. Kúıeýin sol qara aıǵyryna mingizip, aldyna úlken qaraǵaıdy búrimen óńgertip, arqanmen tańyp, jaýdyń ketken izimen jeteleı jónelipti.
Jylqylardy aıdap bara jatqan jaýdyń sheti kóringende, áıel qara aıǵyrdyń júgenin sypyryp qoıa bergen eken. Jylqylardy kórgen qara aıǵyr jaýǵa qaraı kisineı azynap shaba jóneledi.
Qara aıǵyrdyń shabysy arqasyn qozdyrǵan, delebesin oıatqan jalǵyz kózdi áýlıe qaharlanyp jaýǵa jete bergende, «Toqta! Toqta deımin!» dep aıǵaı salypty.
Azynap shapqan qara aıǵyrdy, ústindegi alpamsadaı jalǵyz kózdi áýlıeni, aldyna óńgerip alǵan dáý qaraǵaıdy kórgen jaý «bir sumdyq kele jatyr eken» dep, aıdaǵan jylqylaryn tastaı salyp, jan-jaqqa qashyp ketipti.
Jalǵyz kózdi áýlıe bolsa, jaýdy jeńip, aman-esen aýlyna qaraı qýana shaýypty.
You Might Also Like
-
Bilim-all.kz jáne Bilimland.kz saıttary birlese uıymdastyryp otyrǵan Esse jáne óleń-jyr baıqaýynyń taǵy bir úzdik týyndysy anyqtaldy.
-
Ózi kúıshi, ózi seri bir jigit jurt qaraǵandaı jorǵa atyn joǵaltyp, izdep júrip bir aýylǵa tap bolady. Beıtanys aýyl bolǵan soń úı tańdap júrsin be, shetkerirek tigilgen bir úıge at basyn burady. Sál...
