InfoHub Logo

Sabaqtyń maqsaty: Oqýshylardyń «dostyq» qundylyǵy týraly túsinikterin keńeıtý.
Sabaqtyń mindeti:
1. Dostyq qarym - qatynastyń ómir súrýge yqpal etetin faktorlarynyń biri ekenin túsindirý;
2. Shynaıy dos qandaı bolatyny týraly túsinik berý;
3. Adal dostyq pen amal dostyqty ajyrata bilýdi úıretý;
Kórnekiligi: oqýlyq, dápter, úntaspa, ulaǵatty sózder, túrli - tústi qaǵaz, plakat, túrli - tústi stıkerler.
Sabaqtyń túri: aralas sabaq
Sabaqtyń ádis - tásilderi: mátinmen jumys, suraq - jaýap, oıyn, dáptermen jumys, shyǵarmashylyq jumys.

Sabaqtyń barysy:
Uıymdastyrý kezeńi
1. Oqýshylarmen sálemdesý.
2. Oqýshylardy túgendeý.
3. Sabaqqa daıarlyǵyn tekserý.
Úı tapsyrmasyn suraý
Shattyq sheńberi.
Balalar, bárimiz shattyq sheńberine jınalaıyq. Endi bir - birimizge búgingi kúnimizdiń tamasha ótýine arnap, bir - birimizge gúlder usyný arqyly jaqsy tilekter aıtaıyq.
Áńgimelesý
- Dostyq degen ne? Ony qalaı túsindirer edińder?
- Seniń naǵyz dosyń kim?
- Synyptas pen dostyń aıyrmashylyǵy bar ma?
- «Adal dostyq» degendi qalaı túsinesińder?

Mátinmen jumys.
Eki dos
Eki dos bir egistikte jumys isteıtin. Biriniń otbasy, balalary bar, al ekinshisi jalǵyz basty edi. Kún batqanǵa deıin jumys istep, dostar tapqan ónimdi tepe - teń etip ekige bólip alatyn. Bir kúni jalǵyz basty adam ishinen: «ónimdi jáne shyqqan paıdany tepe - teń bólgenimiz durys bolmady, men jalǵyz turamyn, sondyqtan da aıtarlyqtaı kóp qajettiligim de joq» dep oılady. Osyndaı oımen, tún saıyn bir qap ónimdi dosynyń úıiniń aldyndaǵy saraıǵa jasyryn aparyp turdy.
Dosy da ishinen: «Ónim men paıdany birdeı bólgenimiz durys emes, meniń otbasym bar, qartaıǵan shaǵymda olar maǵan qaraıdy. Al dosymnyń bolsa eshkimi joq, qartaıǵan kezinde oǵan qaraıtyn adam bolmaıdy.» dep oılaıdy. Osylaısha bul da tún jamylyp, úıden shyǵyp dosynyń qorasyna ónimdi aparyp turady. Alaıda qoradaǵy qaptardyń sany nelikten azaımaıtynyna eki dos ta túsinbeı júredi. Bir túni bir - biriniń qorasyna jasyryn qap tasyp júrgende, olar kezdesip qalady. Sonda ǵana olar bolǵan jaıdyń mánin túsinedi. Qaptardy jerge qoıa salyp, dostar qushaqtasa ketedi.
- Dostardyń bir - birine degen adal nıeti men dostyǵyn qalaı baǵalar edińder?
- Óz dostaryńa qalaı kómek kórsetip júrsińder?

Tynyshtyq sáti
Balalar denelerińdi túzý ustap, bastaryńdy joǵary kóterip, yńǵaılanyp otyryńdar. Kózderińdi jumsańdar da bolady. Aýany tereń jutyp, erkin tynystańdar, aınaladaǵy barlyq tirshilik ıesi senderdi aıalap, qorshap, qamqor bolyp jatqanyn sezinińder. Tula boılaryń jaqsylyqqa, mahabbatqa tolǵanyn sezinýge umtylyńdar.

Oıyn
Oqýshylar tańdap alǵan áripterin paıdalana otyryp suraqtarǵa jaýap berýi tıis.
Úlgi: A - árpi
- Sen dosyńdy qalaı jaqsy kóresiń?
- Adalym, ardaǵym …
- Ómirde dos bolmasa ne bolar edi?
- qıyn, qyzyq emes
S - árpi
- Dosyńdy nelikten jaqsy kóresiń?
- Syrlas, symbatty bolǵandyqtan….
- Seniń dosyń qandaı?
- ádemi, ásem
- Dosyńmen qalaı aralasasyń?
- erkin, erekshe
- Dosyńnyń qandaı minezi unaıdy?
- jaıdarly, jarqyn, janashyrlyq

Dáptermen jumys.
Dápterimizdegi osy taqyrypqa baılanysty 1 tapsyrmany oryndaıyq.
«Qarym - qatynas qandaı jaǵdaıda dostyqqa ulasady?»

Dáıeksóz.
Dos adam artyq suramaıdy. ( Mahmut Qashqarı)
Dos dostyń kemshiligin keshire beredi. (Júsip Balasaǵun)
Dosy joqpen syrlas, dosy kóppen syılas. (Abaı)
Dostarynyń sátsizdikterine árkim kóńil aıtyp, aıanysh bildire alady. Biraq dosynyń jetken jetistikterine qýana alatyn adam kemde - kem. (Oskar Ýaıld)
Sergitý sáti.
Aldymyzda alma aǵashy tur dep elesteteıik. Alma aǵashy óte úlken. Odan alma alý úshin qolymyzdy joǵary kótereıik. Qane taǵy qolymyzdy sozaıyq, aıaǵymyzdyń ushymen turaıyq.
Jaǵdaıatty sheshý.
1. Talǵat qansha áýrelense de, esepti shyǵara almaı qoıdy. Mektepke kele sala kórshisi Zeıneptiń dápterin surap, odan kóshirip aldy. Alǵashqylaryn kóshirip, kelesi esepke kelgende Zeıneptiń qatesin baıqap qaldy. Biraq Talǵat óz dápterine eseptiń sheshýin durystap jazdy. Alaıda ol bul týraly Zeınepke aıtqan joq.
2. Sen asyǵyp barasyń, eshqandaı keshigýge bolmaıtyn kezdesýiń bar. Dosyń saǵan tez kelip ketshi, bir jaǵdaımen óte qatty qysylyp turmyn dedi. Seniń áreketiń.

Oıyn.
«Dostyq neden bastalady, dostyqqa ne jarasady»?
(Oıyndy sıgnaldy qıma qaǵazdar arqyly oınaıdy)
Sharty: Eger men aıtqan oımen kelisseńder jasyl tústi kóteremiz, eger kelispeseńder sary tústi kóteresińder.- Dostyq tanysýdan bastala ma?
- Dostyqqa qamqorlyq jarasa ma?
- Dostyq tóbelesten bastala ma?
- Dostyqqa meıirimdilik jarasa ma?
- Dostyq renjisýden bastala ma?
- Dostyqqa adaldyq jarasa ma?
- Dostyqqa tatýlyq jarasa ma?
- Dostyq uıymshyldyqtan bastala ma?
- Dostyq birlikten bastala ma?

Shyǵarmashylyq jumys. (Oqýshylar topqa bólinip, plakatqa sýret salady.)
Qorytyndy:
Búgingi sabaqtan ne aldyńdar? Ne úırendińder?
Júrekten - júrekke:
Endi sizderdi «júrekten júrekke» aıdaryna shaqyramyn. Ortada qobdısha tur. Onda túrli tústi júreksheler bar. Kimge qaı tústi júrekshe unaıdy, sony alaıyq.
Qyzyl – adamgershilik, sary – adaldyq, qyzǵylt – meıirimdilik, kógildir – súıispenshilik, jasyl - ádeptilik, kók – izettilik, aq – qaıyrymdylyq. Osy qasıetter boılaryńyzǵa darı bersin.