InfoHub Logo

Otyzynshy jyldary qurylǵan Qaraqum — Saǵyz óndirisi mekemesiniń qarajatyn talan-tarajyǵa saldy degen jalamen aıyptap, sol mekemeniń bastyǵy Taýshaev Jaǵal on jylǵa sottalady. Sot prosesi Aral qalasynda júrgiziledi. Sottyń úkimi boıynsha aıypker tıisti jerge shaǵym aryz berip, shaǵynýyna jetpis eki saǵat qana ýaqyt beriledi. Ol osy ýaqyttyń ishinde aryz berip úlgerýi kerek. Kesh qalsa aryz qabyldanbaıdy dep kórsetiledi. Biraq halyqqa qadirmendi, abyroıly Jaǵaldy aýdannyń beldi basshylary bir aı kepildikke surap alady.

Kepildikke shyqqan soń Jákeń sottyń úkiminiń kóshirmesin alyp, Almatyǵa Joǵarǵy sotqa júginýge ketedi.

Ol kezdegi jolaýshylar poezy árbir razezd ben stansıaǵa toqtaıtyn «Maksım» poezy. Sol poezben úsh táýlik jol júrip barady. Orys tilin óte jetik biletin Jákeń qolyndaǵy adresimen eshkimnen surap áýrelenbeı-aq, Joǵarǵy sottyń keńsesin taýyp alyp, sottyń kabınetine kirip barady.

Tórde sottyń tóraǵasy otyr eken. Keskin-qıapaty kelisken qazaqtyń kádimgi mońǵol bas azamaty. Amandyq-saýlyqtan keıin Jákeń qolyndaǵy sot úkiminiń kóshirmesi men shaǵym aryzyn beredi de, ózi tynysh otyrady.

Sottyń tóraǵasy úkimdi baıyptap oqyp, ár jerin qaryndashpen belgilep, basyn shaıqap kóp otyrady. Shamasy úkim buzylýǵa jatpaıtyn bolyp zańdy jazylǵan bolýy kerek. Bir ýaqytta sottyń tóraǵasy taǵy da basyn shaıqap:

— Qatpa bolǵan túıege oısyl qara ne qylsyn-aı! — dep

Jaǵalǵa qaraıdy. Munysy onyń isiń aýyr, qolymnan kelmeıdi degeni edi.

Sol kezde Jákeń ornynan ushyp turyp:

— Qatpa bolmasa, ol túıe oısyl qarany ne qylsyn-aı! — dep jaýapty birden sart etkizedi.

Tóraǵa endi qaıtyp tilge kelmeıdi. Jaǵaldyń qolyna úıiniń adresin jazyp beredi de:

— Úıge bara berińiz. Men kóp keshikpeı jetemin, — dep Jákeńdi úıine jiberedi. Artynan ózi de kelip Jaǵalmen jaqynyraq tanysady. Úı egesi qazaqtyń sóz tyńdaýǵa qumar jáne áńgime tarıhty kóp biletin quımaqulaq kisi eken. Ekeýi birine-biri saı kelip, nebir shyryn áńgimelerdi qozǵaıdy. Tanysady, bilisedi.

Bir jetiniń ishinde isti Qyzylordadan aldyryp, ony qarap, kóterilgen másele durys emes, jala dep taýyp, Jákeńdi aqtap jiberedi. Sot qashan aqtaǵansha, Jákeńdi óz úıinde saqtaıdy.

Aqtalyp qaıtyp kelgen Jákeń armysyń aıta kelgen aǵa-inileri men zamandastaryna Joǵary sot tóraǵasynyń qazaqtyń kóne áńgimesi men shejiresin kóp biletinin, tilmar sheshen ekenin, júregi taza, kirshiksiz adal azamat ekenin kóp áńgime etip aıtyp júripti.

---