InfoHub Logo

Ońtalap Jarylǵasynov Qazaq SSR-niń 30 jyldyǵy atyndaǵy kolhozda basqarma presedateli bolyp kóp jyl istegen. Halyqtyń kúısiz ýaqyty. Ońtalap kolhozǵa kelisimen qolda bar múmkinshiligin tolyq paıdalanyp, aq egis pen kúrishti ýaqytynda egip, oıdaǵydaı baptap ósirýge kúsh salady, kolhoz mol ónim alady.

Bir kúni «Kalının» ýchaskesindegi bitik ósken kúrishti aralaıdy. Biraq kúrishtiń basynda eshkim joq, aryqtaǵy sý jaǵalap dalaǵa ketip jatyr. Muny kórgen Onekeń ortalyqqa qaıtyp kelip, aýylda júrgen bir kolhozshyny shaqyryp alyp:

— «Kalının» ýchaskesindegi kúrishke baratyn aryq jyǵylyp ketip, sý aıdalaǵa ketip jatyr. Tez baryp, sony baılap kel, — deıdi. Anaý:

— Ný, horosho, baramyn, — dep shyǵyp ketedi.

Onekeń sharýashylyqtyń ózge ýcheskesin aralap keshkisin aýylǵa kelisimen sýdy baılaýǵa jumsaǵan, baǵanaǵy kolhozshyny shaqyryp alyp:

— Bardyń ba, aryqty baıladyń ba? — dese, anaý:

— Barǵanym joq, — deıdi.

Aıtqan ýádesin oryndamaǵan janǵa ishteı renjigen Ońtalap brıgadırge tapsyrma berip, aryqty túnde bógetedi.

Taǵy birde sharýashylyqtyń jumysyna baǵanaǵy kisini jumsaıdy. Predsedateldiń munysy álgini synaý edi. Ol oǵan túsinbeı, Onekeńdi taǵy bir aldaıyn dep oǵan:

— Ný, horosho. Muny qatyryp kelemin, — deıdi. «Ný, horoshonyń» jumysyn baqylaǵan Onekeń ony shaqyryp alyp, surasa, taǵy da barmaǵanyn aıtady.

Osydan soń Ońtalap oǵan senýdi qoıady. Soǵys aıaqtalǵanmen, halyqtyń jaǵdaıy óte nashar kezi. Bir kúni álgi «ný, horosho» kelip predsedatelden:

— Ońtalap aǵa, balalardyń azyǵy túgesilip, úıde ishetin eshnárse joq, únemsiz otyrmyz. Múmkindigi bolsa eki-úsh put shıin berseńiz, — deıdi.

Ońtalap ta irkilmesten:

— Ný, horosho, qoıma meńgerýshisine aıtarmyn, — depti.

Anaý qoımaǵa baryp:

— Onekeń «2-3 put shıin alarsyń» dep edi. Saǵan aıtty ma? — dese, ol:

— Joq, Onekeńdi kórgen joqpyn, — deıdi.

— Oneke, áneýgi shıindi áli ala almaı júrmin. Qoımashy bermeıdi. Soǵan ber dep aıtpaısyz ba? — dep ótinedi. Onekeń bolsa:

— Ný, horosho, qoımashyǵa aıtaıyn. Alasyń, — dep jumysqa ketip qalady. Ekinshi ret baryp suraǵanda da qoımashy:

— Onekeń eshteńe aıtqan joq. Onsyz men eshteńe bere almaımyn, — deıdi.

Manaǵy adam endi Ońtalapqa bara almaıdy. Arada bir apta ótedi. Sodan soń Ońtalap ony ózine shaqyryp alyp:

— Aý, jigitim, «ný, horosho» qalaı eken. Sen meni eki ret aldadyń. Biraq meni ǵana aldap qoıǵan joqsyń, kolhozdyń barlyq kolhozshysyn aldadyń. Jáne olardyń aldaǵy turǵan nesibesine kesirińdi tıgizdiń. Bul — seniń óz kolhozyńa tıgizgen zıanyń. Al men seniń «ný, horoshońdy» aldyńa tartyp ózińdi ǵana aldadym. Endigári munysyn qoıar ma eken dep. Sonymen kim utty? Endi túsingen shyǵarsyń, ótirik aıtýdyń paıda
bermeıtinin, — dep úsh put shıinge qaǵaz jazyp beredi. Qaǵazdy berip turyp:

— Bul saǵan emes, ana úıdegi jas balalar úshin berildi, — degende, anaý:

— Oneke, endi qaıtyp jalǵan sóz aıtpaımyn. Qoǵamnyń jumysynan basty da tartpaımyn. Túsindim, — depti.

---