InfoHub Logo

Meniń 16-17 jastaǵy kezim. 1901 jyldyń kúzi. Ákem marqum shaqyryp aldy da:

— Shyraǵym, Jaqan, jasyń bolsa 16-17-ge kelip qaldy. Úıdegi kúnkóris qareketimizdi kórip otyrsyń, tapqanymyz tamaǵymyzǵa jetpeı otyrǵanyn. Jurt mynaý irgemizdegi Ekibasqa aǵylyp baryp jatyr. Onda jumys istep aqsha taýyp jatqan kórinedi. Bala-shaǵalar men shesheń aýylda otyra tursyn. Ekeýmiz Ekibasqa baraıyq, jumys istep aqsha tabaıyq — dedi.

— Jaraıdy, áke! — dedim men.

Ákemiz ekeýmiz Ekibastuzǵa keldik. Kelsek biz sekildi jumys izdep kelýshiler óte kóp eken. Tipti, bala-shaǵalarymen shubyryp kelýshiler de bar eken. Kelgenderge birden jumys tabyla qoıǵan joq. Jumysqa túspegenderge úı de bermeıdi. Tipti, burynǵy ornyqty jumysshylardyń ózderiniń úıleri de joq eken. Sondyqtan úısiz, azyqsyz, qorǵansyz qalǵan bosqyndar kúni-túni dalada jatty. Jondy alyp ketti. Keshkilikte otbasynda aınala otyrysqandar aýyr kúrsine otyryp qaıǵyly ánge salatyn edi. Sonyń nábir jeri ǵana esimde qalypty:

Keldik biz Ereımenniń dalasynan,
Qashqan kóp aǵaıynnyń jalasynan.
Qamaldyq Ekibasqa barsha halyq
Aǵylǵan Ertis, Baıan salasynan.
Jazylar kún bolar ma biz sorlyǵa,
Denege salǵan ómir jarasynan.

O, shirkin dúnıe deseıshi?! Neni kórmedik? Neni estimedik? Jınalǵan halyqty jumysqa búgin alamyz, erteń alamyz dep, kúzgi sýyq túskenshe qamamasy bar emes pe? Aqyrynda jumysqa da qaltasynda puly bar adamdar ǵana alyndy. Qalǵandary qar túse bet-betimen shubyryp ketti. Sondaıdy da kórgenbiz.

---