Jan qaıda ádiletti izdeıtuǵyn,
Adamshylyq ataqty kózdeıtuǵyn.
Tirlik pen ólgen kúndi birdeı oılap,
Eki jaıdan kúderdi úzbeıtuǵyn.
Aramǵa azǵyrǵandy sezbeıtuǵyn,
Aram oıdyń qıalyn kezbeıtuǵyn.
Kórine shaıtan kelip azǵyrsa da,
Adamdyq, ar ımannan bezbeıtuǵyn.
Nashardy, momyndardy ezbeıtuǵyn.
Aramdyq teńizinde júzbeıtuǵyn.
Aıtylǵan ýaǵadany berik ustap,
Aınyma, myljyń sózdi ezbeıtuǵyn.
Baǵalap «altyn», «kúmis», «jez» deıtuǵyn,
Baılaýly sonyń sózi — sóz deıtuǵyn,
Aıtqany, istegeni aqtyq joly,
Qurýly elde ádil tez deıtuǵyn.
Ondaı jan oılaýshy edik molda bolar,
Teń basqan tórt aıaǵyn jorǵa bolar.
Kedeı, baı, hajy, tóre — bári bir bás,
Teńizdeı álem qanǵan orda bolar.
Bul kúnde molda ataýly sorǵa bolar,
Kedeı, momyn túsetin tor da bolar.
Nashar bolsań shyǵarmaı janazańdy,
Malyń bolsa, búrkitteı qolda bolar.
Aınýdy, azǵyndyqty molda bastar,
Sózi ońdy, isi jaýyz, aram nastar.
Basqaǵa «pálen et» dep buıyrǵanyn,
Óz basy ómirinde qylmaı tastar.
Moldany ol sekildi kórdi kózim,
Buzatyn ózi aıtqan bata sózin.
Basqaǵa sharıǵatty sýsha aǵyzyp,
Ózi ony istemeıtin soqyr sezim.
Qyz da kóp syrty sulý, beti jaqsy,
Bir kergende degendeı «minim tapshy».
Albyrt kóńil arman ǵyp, umtylatyn:
«Qolyń jetse aıanbaı, ustap baqshy».
Qyz jaıyn kim biledi jaqyndaspaı,
Oı túkpirin aqtaryp, syryn ashpaı.
İshinde ıt óligi jatqan qyz kóp,
Kórge birge túsetin betin ashpaı.
Sonyq biri Halıma molda qyzy,
Betke shyqpaı kómilgen júrek syzy.
Baı tańdamaı, mal tańdap, neke buzǵan,
Buıyrmaı batalyǵy, dámi-tuzy.
Azǵyrǵan álde ákesi qulqyn úshin,
Álde ózi, kim tintipti onyń ishin.
Halıolladan Jaqypty artyq kórip,
Súıgeni tań qalamyn qandaı pishin.
Qara sur adam edi, tapal boıly,
Mal jandy, baqqa qumar, aram oıly.
Ne kórik, ne symbat joq, qara kójek,
Ne súıdi, qyzdyń kózi nege toıdy?
Álde ony jastyq pa eken qýalaǵan,
Qolǵa túsken pushpaqty ýqalaǵan?
Nemese, saıqal Jaqyp ebin taýyp,
Qańǵyrtyp qyzdyq basyn dýalaǵan.
Qyz ǵoı dep oılaýshy edik kórip syrttan,
Shyqty ǵoı qatyn bolyp eldi qurtqan.
Mysyqsha kóp kózinshe kózin jumyp,
Tún bolsa, tyshqan aýlap, túnde jortqan.
Qaıǵyrma ondaı qyzǵa ketse-daǵy,
Qatynsyz kúniń solaı ótse-daǵy.
«Mensinbedi» degen sóz etten ótip,
Namys qozǵap, súıekke jetse-daǵy.
Tabylar taǵy sondaı qara qatyn,
Súıisken mahabbaty odan jaqyn.
Syrty sende, ishinde basqa jatsa,
Sol emes pe naǵyz sor kesapatyń.

---