InfoHub Logo

Memleket basshysy Nazarbaev Ýnıversıtetiniń medısına mektebinde boldy, dep habarlaıdy Aqordanyń baspasóz qyzmeti.

İs-shara barysynda Qazaqstan Prezıdenti beıindi bilim berýdiń zamanaýı talaptaryna tolyqtaı saı keletin medısına mektebiniń jańa ǵımaratyn aralap kórdi.

Sondaı-aq, Nursultan Nazarbaev oqýshylarmen jáne pedagogtarmen kezdesti.

Áńgimelesý barysynda Elbasy qazirgi ýaqytta álemniń medısına men bıologıa salasyndaǵy ǵylymı progres aldynda turǵanyn atap ótti.

- Jańa medısına mektebiniń jabdyqtalýyn, oqytý deńgeıin álemniń úzdik ýnıversıtetterimen salystyrýǵa bolady. Sondyqtan men ózderińizden úlken jańalyqtar kútemin. Sizderdiń zertteýlerińiz, zerthanalyq múmkindikterińiz, oqytýshylardyń ǵylymı áleýeti syrqattyń eń kúrdeli túrlerin emdeýdiń, adam ómirin uzartýdyń jańa ádisterin tabýǵa múmkindik beredi. Bul mektep ózimen birge basqa ýnıversıtetterdi ilgeri jeteleıtin negizgi bazalyq oqý orny retinde quryldy, - dedi Memleket basshysy.

Sonymen birge, Qazaqstan Prezıdenti XXI ǵasyrda aqparattyq tehnologıalarmen qatar medısına men bıologıanyń da aldyńǵy orynǵa shyǵyp otyrǵanyn aıtty.

- Barlyq ǵylymdar ózara baılanysty, kóptegen jańalyqtar olardyń toǵysýynan paıda bolady. Osy oqý ornynyń qabyrǵasynda ǵylym damýǵa tıis, bizge jan-jaqty ǵalymdar qajet, - dedi Nursultan Nazarbaev.

Sońynda Elbasy jınalǵandardy oqý ornynyń jańa ǵımaratynyń ashylýymen quttyqtap, alǵa qoıǵan maqsattaryna jetýine tilektestik bildirdi.

Aıta keterligi, medısına mektebiniń ǵımaraty 9 qabattan turady, jalpy kólemi - 39 825 sharshy metr. Onda ǵylymı jáne oqý zerthanalary, sımýlásıalyq ortalyq, anatomıalyq zerthana, leksıa zaldary men toptyq sabaq alýǵa jáne keńsege arnalǵan bólmeler, kitaphana, ashana bar.

---