InfoHub Logo

Búgingi tańda elimizde bilim berý mazmuny jańa baǵytqa bet burdy. Elbasy  N.Nazarbaev óz sózinde: «Biz qazir «bilim-ǵylym-ınnovasıa» atty úshtik ústemdik quratyn postındýstrıalyq álemge qaraı baǵyt alyp baramyz», - degen bolatyn.  Endeshe, elimizdiń álemdik úrdisterge enýi bilim berý júıesiniń jańa sapalyq deńgeıge ótý qajettiligin arttyrýda ekeni túsinikti.

Qazaqstan Respýblıkasynda orta bilim berý mazmunyn jańartý sheńberinde bilim berý úderisiniń qurylymy men mazmunyna eleýli ózgerister engizilýine baılanysty Qaraǵandy qalasynda «Nazarbaev zıatkerlik mektepteri» DBBU Pedagogıkalyq sheberlik ortalyǵynyń uıymdastyrýymen 27 maýsym men  22 shilde aralyǵynda  qazaq tili páni boıynsha  pedagogıka kadrlarynyń biliktiligin arttyrý kýrsy ótti.

Kýrsqa alǵash kelgen kúnnen bastap, kókeıimizde júrgen kóp saýaldardyń jaýaptaryn aldyq, jalpy bilim berý mazmunynyń ózgesheligimen, ereksheligimen tanystyq. Biz osy oqý barysynda qazaq tilin jańa mazmunda oqytý boıynsha dáris-trenıngter tyńdap,  jańartylǵan bilim berý baǵdarlamasynyń qurylymyn, maqsat-mindetterin túsinip, osyǵan sáıkes pedagogıkalyq tásilderdi, bilim berý baǵdarlamasyndaǵy oqý maqsattaryna jetýde krıterıaldy baǵalaý júıesin qoldanýdy úırendik.  Orys tildi mektepterde qazaq tilin oqytýda  oqýshylardyń boıynda tildik quzirettilikterdi   qalyptastyrý boıynsha qoldanylatyn belsendi oqytý strategıalarymen, aýdarmasyz oqytýdyń tásilderimen tanystyq. Tek tanysyp qoımaı, tájirıbe barysynda iske asyrdyq, túrli tapsyrmalar men jattyǵýlar ázirledik. Muǵalimderdiń sabaq berý úrdisinde negizge alatyn 3 qujatpen – Oqý baǵdarlamasy, oqý jospary jáne qalyptastyrýshy baǵalaýǵa arnalǵan tapsyrmalar jınaǵymen tanysyp, jumys jasadyq.    Mundaǵy jańa oqý baǵdarlamasynyń ereksheligi – onyń HHİ ǵasyr daǵdylaryn damytýǵa baǵyttalǵandyǵynda, ıaǵnı aqparatty izdeý, taldaý jáne ınterpretasıalaý daǵdylaryn damytý; adam, tabıǵat jáne qoǵam týraly olardyń bastapqy bilim qorlaryn qalyptastyrý (álemniń birtutas beınesi); rýhanı-adamgershilik qundylyqtaryn damytý.

Jańa baǵdarlamany meńgerý barysynda erekshe este qalǵan myna ádis-tásilder sabaqtyń tıimdi ótýine, oqýshy boıynda qajetti 4 daǵdyny(tyńdalym, aıtylym, jazylym, oqylym) qalyptastyrýǵa yqpal etetini sózsiz: «Shyǵys bazary», «Bilim qabyrǵasy», «Ystyq oryndyq», «Pikirler syzyǵy», «Sana saıajoly», «9 romb», «5 qadam», «Drama ádisi», «Ádebıettik úıirme», grafıkalyq organaızerler – «Dara dıagram», «Qos dıagram», «Oqıǵa taýy», «Hıkaıa kartasy», «Emosıa kestesi», t.b.

Kýrstan óte kóp jańalyq, bilim aldyq.  Bizdiń bilimge degen qushtarlyǵymyzdy arttyryp, dáris bergen trenerimiz Smaıl Aıken Isataıyzyna  aıtar alǵysymyz mol! «Jaqsy adam ǵana jaqsy basshy bola alady», -dep Júsip Balasaǵunı babamyz aıtyp ketkendeı, jattyqtyrýshymyz bizge óte ádil, meıirimdi, bilimdi, alǵyr basshy bola bildi. Aldyńǵy bilimdi ótken bilimmen salystyra, ushtastyra otyryp, túsinbegenimizdi qaıta túsinidirip, ár tyńdaýshynyń sanasyna jetkize bildi.  Kýrs aıasynda bilimimizdi odan ári shyńdaı tústik, ár sabaq tartymdy, qyzyqty ótti.

Qoryta kele, men maqalamdy  aqyn Mirjaqyp Dýlatovtyń  «Jalǵyz súıenish, jalǵyz úmit – oqýda. Teńdikke jetsek te, jurttyǵymyzdy saqtasaq ta, dúnıedegi sybaǵaly ornymyzdy alsaq ta, bir ǵana oqýdyń arqasynda alamyz. Jaqsylyqqa bastaıtyn jarqyn juldyz – oqý. Nadan jurttyń kúni – qarań, keleshegi — tuman» degen sózderimen aıaqtaǵym kelip otyr. HHİ ǵasyr – ǵylym ǵasyry. Maqsatty bilim berý – tulǵa damýyn júzege asyratyn másele. Al osy jalpyeýropalyq stnadartqa saı  jańa bilim berý  -  jeke tulǵanyń jan-jaqty damýyna ákeletin birden-bir jol!

---