InfoHub Logo

Japonıanyń Osaka qalasynda ótken Jer týraly olımpıadada qazaqstandyq oqýshylar baq synady. Astana qalasy №4 gımnazıa-mektebiniń 10-synyp oqýshysy Jaǵyparova Álıa, Nazarbaev zıatkerlik mektebiniń oqýshylary Aımýhambetova Ázıza, Baımýrzına Ádıa jáne Tólegenova Arýjan qatarly tórt oqýshy el namysyn qorǵap qaıtty.

Jer týraly halyqaralyq ǵylymı olımpıada (IESO – International Earth Science Olympiad) – geologıa, meteorologıa, muhıttaný jáne astronomıa pánderi boıynsha orta mektep oqýshylary arasynda jyl saıyn ótip turatyn saıys. Bul olımpıadaǵa atalmysh baǵytta memlekettik jeńimpaz atanǵan oqýshylar ǵana baq synaı alady.

Bıyl Osaka qalasyndaǵy halyqaralyq saıysqa álemniń 33 elinen 300-den astam úmitker qatysty. El abyroıyn asqaqtatyp qaıtqan oqýshylarǵa alǵys bildirgen QR Investısıalar jáne damý mınıstri Jeńis Qasymbek olardyń jetistikterin atap kórsetti.

"Japonıanyń Osaka qalasynda ótken IESO – 2016 Jer týraly halyqaralyq ǵylymı olımpıadasyna bir top jas geologtarymyzdy shyǵaryp salǵan edik. Sol jas ǵalymdarymyz barsha qazaqstandyqtardyń senimin aqtap, elge júldemen oraldy. Astanalyq №4 gımnazıa-mektebiniń 10-synyp oqýshysy Álıa Jaǵyparova jeke synaqta qola medal jeńip aldy. Oǵan qosa, halyqaralyq komanda quramynda Jer týraly ǵylymdar jónindegi jobada (Earth Science Project) birinshi orynǵa ıe boldy. Al Nazarbaev zıatkerlik mektebiniń 10-synyp oqýshysy Ádıa Baımýrzına ITFI (Halyqaralyq komandalyq dalalyq zertteý) komandalyq saıysta birinshi orynǵa ıe boldy. Onyń synyptastary Ázıza Aımýhambetova men Arýjan Tólegenova da barlyq saıystarǵa belsendi qatysyp, jarysty abyroımen aıaqtady" - dep jazady IDM Jeńis Qasymbek.

---