InfoHub Logo

Ózim jaqsylyq pen jamandyq arasynda tańdaý jasaıtyn kezde, ómirdiń tym qysqa ári barlyǵynyń ýaqytsha nárse ekenin esime túsiremin. Sebebi, ár nárseniń suraýy bar. Búgin bireýdi qýantsańyz, erteń sizdi bireý erekshe qurmetpen syılap, tórine shyǵarady. Bireýdi jylatsańyz, erteń kútpegen jerden tósek tartyp jatyp qalýyńyz múmkin. Sol sebepti, árdaıym adamgershilik syndy qasıetti joǵary ustaǵan durys. Tipti, bireýge jasaǵan jaqsylyǵyńyz ben jamandyǵyńyz búgin qaıtpasa, erteń sonyń barlyǵy balalaryńyzǵa qaıtady. Dál qazir bireýge jamandyq jasaǵan sátińizdi esińizge túsirińizshi. Sol nárse ózińizge qaıtyp kelgen kezde qatty qınaldyńyz emes pe? Bir kezderi men de osylaı jasap edim ǵoı dep san soǵyp qalǵan kezińiz boldy ǵoı. Endi bireýge jaqsylyq jasap, ony qýantqan sátińizdi eske alyńyz. Osydan keıin bir qýanyshtyń artynan myń qýanysh erdi emes pe? Olaı bolsa, tańdaý erki ózińizde. Qysqa ǵana ǵumyrda haıýandardyń qataryna qosylǵyńyz kele me? Álde adam degen adal atqa laıyq bolyp ótkińiz kele me? Iaǵnı men jaqsy adam bolý úshin eń aldymen adamgershilik degen qasıetti damytar edim. Qazaqta “Adam bolyp kelgen soń, adam bolyp ketý qıyn” degen jaqsy sóz bar. Men úshin qasıetterdiń eń jaqsysy – adamgershilik. Sebebi, jaqsy qasıetterdiń jıyntyǵy – adamgershilik dep atalady. Afrıkalyqtardyń “Jeıdesiz adamnyń jeıde syılaǵanynan, ózin súımeıtin adamnyń seni súıemin dep aıtqanynan qoryq” degen jaqsy máteli bar. Rasymen de, bireýdi súıip, bireýge jaqsylyq jasamas buryn ózimizdi syılap, ózimizge janashyrlyq, adamgershilik syndy qasıetterdi úırete bilýimiz kerek. Adamgershilik degenimiz ne? Ol – qınalǵan janǵa janashyrlyq tanytý, jylaǵan adamdy jubatý, bireýdiń ala jibin attap ótpeý, úlkendi syılaý, kishige izet kórsetý, tabıǵatty aıalaý, súıý, mahabbatqa berik bolý, súıgenińe adal bolý, shynaıylyqqa umtylý, ádilettilik tanyta bilý jáne t.b. Biz ómir súrip jatqan ǵasyrda adamgershilikti saqtap qalý óte qıyn. Sebebi, bizdi azǵyratyn aqsha bar, altyn bar, ataq pen dańq bar, jelidegi myńdaǵan lúpil bar. Osynyń barlyǵy bizdiń shynaıy bet-beınemizdi kórsetip, adamgershilik tanytýymyzǵa kedergi jasaıdy.

---