Jaqsylyqqa syıapat bar
Baıaǵyda kedeı bir otbasy bolypty. Áıeli jún ıirip, al kúıeýi ony bazarǵa aparyp satýmen kún kóredi eken. Bir kúni jipterin satyp, úıine qajetti azyq-túlik satyp alýǵa bara jatyp, bir kisiniń bireýdi uryp jatqanyn kóredi. Janyna baryp arashalap, sebebin suraǵanynda, urǵan adam: «Ol maǵan aqsha qaryz, kedeı bolǵandyqtan tóleı almaı júr» deıdi. Álgi jip satýshy: «Onyń qaryzyn men tóleımin, qaltamdaǵy barlyq aqshany al!» deıdi. Álgi kisi: «Bul aqsha az, biraq meıli bir amaldap jetkizermiz» deıdi. Osylaısha álgi qaryzdar kisi aman qalady.
Keıin álgi jip satýshy úıine baryp, áıeline jaǵdaıdy túsindiredi. Áıeli: «Meıli. Bir musylmandy qutqaryp jaqsy istepsiń, búginshe sabyr etermiz» deıdi. Erteńine taǵy da bazarǵa shyǵady, biraq jibin sata almaıdy. Kesh bolady, amalsyz úıine qaıtyp kele jatqanynda, qolynda balyq alyp bara jatqan kisini kóredi. Ol: «Men balyqshymyn, búgin balyq sata almadym. Áıelim jip suraǵan edi, sende jip bar eken. Balyq pen jipti aýysamyz ba? - deıdi. Jip satýshy kelisip, zattaryn aýysady. Úıine kelip, áıeline: «Búgin aqsha tappadym, biraq qaryndy toıdyratyn balyq ákeldim. Balyqtardy pisirshi, jep alaıyq» deıdi. Áıeli balyqty tazalap jatqan kezde ishinen altyn shyqqanyn kórip, qatty qýanady. Keıin balyqty pisirip jeıdi. Endi biz baı boldyq dep qýanyp turǵan kezde, álgi balyqshy kelip: «Áıelim razy bolmady. Men saýdadan bas tarttym. Mine jipterdi al da, balyqty qaıtaryp ber» deıdi. Jip satýshy: «Jaraıdy, biraq biz balyqty pisirip jep qoıdyq, ony bere almaımyz. Balyqtyń ishinen altyn shyqty, solardy bereıik» deıdi de, altyndy ákelip beredi, biraq balyqshy altyndy almaı, bylaı deıdi: «Men Hyzyrmyn (aleıhıssalam). Qaryzynyń sebebinen taıaq jegen kedeıge jasaǵan jaqsylyǵyń úshin Allahý ta’ala seni synady. Kedeılik synaǵynan da, baılyq synaǵynan da óttiń. Altyndar seniki» deıdi.
You Might Also Like
