Kógende qozy,
Jelide ńulyn baılaýda.
Jeroshaq byqsyp,
Qazanda baǵlan qaınaýda.
Qazaqy úıdiń qaıyra túrip irgesin,
Qaıǵysyz, qamsyz otyrýshy edim jaılaýda.
Sap-sary qymyz sarqylmaýshy edi keseden,
Otyrýshy edim, kógerip, shalqyp kósegem.
Ońymnan Aıym, Juldyzym týyp solymnan
Baqytty ekem jaralǵan erek peshenem.
Ol-daǵy ótti...
Ony da mise tutpadym,
Nár aldym, biraq násilge ol da juqpady.
Qalaǵa keldim,
Tas úıde turmyn, tamasha!
Taýyqtyń eti, júzimniń sýy jutqanym.
Tamasha qala!
Obaly bosqa ne kerek.
Quıysqan órip, jatpaımyn taǵa shegelep.
Alyp qalanyń azdaǵan shýy bolmasa,
Qyzyl da jasyl, qym-qıǵash ásem tóńirek.
Qalada mynaý turmys ta eren, kúı de eren
Kórmesti kórip, bilmesti bilip, úırenem.
Sál ǵana janym qınala qalsa, dúrligip
Dúnıeniń bárin shaqyryp alam úıge men.
Dert deıtin dert joq,
Dertsiz de qajyp, aýyrdym.
Em bolar ma eken, tútini týǵan aýyldyń?!
Qaıyrymdy qala,
Keshirgin meni, qaıteıin?
Jataıyn baryp, tósinde asqar taýymnyń
Keshirgin meni,
Kók jaılaýymdy saǵyndym!

---