InfoHub Logo

Ana aýyr naýqasqa shaldyqqan edi. Tósek tartyp jatyp qalǵan. Osy kezde onyń jalǵyz uly úılendi. Ana óz ómirinde bul toıdy asyǵa kútken edi. Onda únemi ózin toıdyń ortasynda máre-sáre bop júgirip júrgen qalpynda elestetetin. Biraq anaǵa qazirgi sátte aýyr naýqasy buǵan múmkindik bermedi. Onyń ornyna toıda sińlileri júgirip júrdi ǵoı. Sonda da ana tóseginde jatyp alyp, ulynyń úılenip jatqandyǵyna qýanyp jatty.

Toı da ótti. Adamdar tarap ketti. Tek ananyń janynda keshe ǵana úılengen jas jubaılar qaldy. Jastar únemi as ishetin mezgil bolǵanda, anany da ózderimen birge as ishýge shaqyratyn edi. Biraq ana oǵan jaramaıdy ǵoı. Degenmen únemi: "Meni ózderińniń as ishkeli jatqan bólmelerińe aparyp jatqyzyńdarshy, - deıtin ana. - Men senderdiń qatar otyryp as iship otyrǵandaryńdy kórip jatqym keledi".

Jubaılar anany ózderi as ishkeli jatqan bólmege ákelip jatqyzady. Anaǵa óziniń súıikti uly men ulynyń jary - óziniń kelininiń qatar otyryp as iship otyrǵanyn kórý unaıtyn bolýy kerek. Ana ózi as ishpese de, ulynyń as iship otyrǵanyn kórip jatqandyǵyna qýanady. Ony endi ana ýaıymdamaıdy. Onyń endi qarny ashyp qalmaıdy. Onyń tamaǵyn beretin adamy bar.

Ananyń uly sportshy jigit edi. Múmkin ol ár jarysynan oralǵan saıyn, ana ony óz qolymen tamaqtandyrǵan shyǵar. Sonda uly anasyna erkelep otyryp, óziniń jarysta qalaı jeńgendigin, qarsylasyna qandaı ádis qoldanǵandyǵyn maqtanyp otyryp aıtyp bergen bolar. Anaǵa osy bir óziniń soqtaldaı uly áli bóbek sıaqty kórinetindigi qyzyq. Ana ony maqtanysh etetin edi. Onyń endi kıimi kirsheń tartyp júrmeıdi. Múmkin ana ony óz qolymen talaı ret jýyp ta bergen bolar. Ana endigi sátte ulyn óziniń súıikti kelinine tapsyryp jatqan sekildi edi. Ǵumyrynyń sońǵy kúnderinde osy bir kórinisten shúkirshilik etip, qýat alyp jatty.

Ana kóp uzamaı kóz jumdy. Analar - ómirge urpaq qaldyryp baryp ótetin jandar. Al olardyń urpaqtary jalǵasa beredi.

---