Jas júrek, qaıda seniń ystyk qanyń;
Tap mundaı muzdaýyńnyń aıtshy mánin?
Tátti úmittiń qıaly sáýle berip,
Uıyqtatpaıtyn tolqynnyń joıdyń bárin.
Qyzǵan temir jatqandaı kókirekte,
Syımaıtyn mezgil qaıda qanǵa, janym?
Nanǵyshtyq, qulaı sengish, tátti úmitten
Bul kúnde, aıtshy, nege bet burǵanyń?..
Jıirkenip, kórgiń kelmeı ózińdi-óziń,
Qamyǵyp nege osynsha qurydy áliń?

Álde seniń keń jaılaý jazyń joq pa?
Shalqar kól, qıqý salǵan qazyń joq pa?
Jel jetpes, qolda qyran, altyn dabyl,
Qus-ańdy qutqarmaıtyn tazyń joq pa?

Álde aldynda júrmeı me sylań qaǵyp,
Dalanyń erkeleri úki taǵyp.
Tabıǵat óksimeı me ádemi únmen,
Boztorǵaımen qosylsa ánge salyp.

Sen sonda uqpaımysyń onyń sózin,
Kómir dep oılaısyń ba qara kózin?
Maǵynaly sol qara kóz bir jalt etse,
Jyndanbaýǵa etersiń qalaı tózim.

Jas júrek aıtty sonda: sózime nan,
Sol sebepten ishimde jyly emes qan;
Shyndyq, dostyq tappadym, sandal qaǵyp
Ómir boıy aldandym tapqanymnan.

Búginge adasýdan kóz ashpadym,
Ne nárseni kózdesem, tap baspadym;
Dúnıeden basqa raqat tilemeımin,
Kesh, arym, men bilmestiń adasqanyn.

---