InfoHub Logo

Jas otaýda baqyt tańy atqan kún
(Jas jubaılarǵa tilek)

Qurmetti Jas jubaılar!

Sizder dál qazirgi ýaqytta Otbasy atty jańa da jas memlekettiń teń quqyqty qojaıynyna aınala aldyńyzdar. Osynaý jolda ómir sizderge qýanyshy men qyzyǵyn qatar usyna otyryp, qos júrekte birdeı laýlaǵan sezimderińizdiń beriktigin de synaqqa salýdy umytpaıdy. Sol synaqta sizderdiń Mahabbattaryńyz Ómir teńizindegi jubaılar mingen baqyt kemesiniń udaıy jelbirer jelkenine aınala bersin!

Ulaǵatty ul, uıaty bar qyz ósire otyryp, olardyń baqytty bolashaǵyna qıal patshalyǵynda san ret, tipti uıqysyz túnderde oı júgirtken qos ata-ananyń kóz aldynda dál qazirgi sátte olardyń óz perzentteriniń júrek qalaýymen qalap tikken Aq Otaýy paıda boldy. Baqytty jubaılar, bul - sizderdiń otaýlaryńyz. Sol otaýlaryńyzdyń shańyraǵy sizderdiń asqaq armandaryńyzdyń belgisindeı bolyp bıikteı bersin, sol otaýlaryńyzdyń irgesi sizderdiń selkeýsiz senimderińizdiń kórinisindeı bolyp bekisin, kóńil tórlerińizdiń keńdigindeı keregelerińiz kerilsin, maqsattaryńyzdyń nyq kórinisindeı bolyp ýyqtaryńyz shanshylsyn, sol otaýdyń úzigi bir-birlerińizge degen jan jylýyndaı jyly da berekeli bolsyn, túńlikterińizden quıylǵan nur rıasyz kúlkilerińizdiń kórinisindeı sáýlesin tóksin!

Búgingi kún - Sizderdiń kúnderińiz! Jubaılyq ómirdiń raýandap atqan árbir tańy Sizderdi baqyt bolashaǵynyń tańǵajaıyp tórine jeteleıdi. Sizderdiń endigi sátte ózderińizdi jastyq ómirlerińizdiń naǵyz baqytty Hanshaıymy men Hanzadasy sezinýlerińizge tolyq quqylaryńyz bar. Ózderińiz arman etken baqyt kúnderińizde Sizderdiń ata-analaryńyz ben týǵan-týystaryńyzdy sol tamasha kúnderińizdiń kýási bolýǵa jazsyn!

Sizder - Otannyń perzentisizder. Sizderdiń Otandaryńyz otbasy qundylyǵynyń beriktigimen myqty. Ol óz perzentterin súıedi jáne Sizderdi de sol baqytty Otandaryńyzǵa jastyqqa tán kúshpen laıyqty qyzmet etýge jazsyn!

Sizder óz ulttaryńyzdyń urpaǵysyzdar. Bul Sizder úshin udaıy urpaq paryzy men mindetterin eske salady. Sizderdi óz bolmystaryńyzdyń boıamasyz qalpyn tuǵyrly qalyptaryńyzda saqtaǵan otbasy múshesi retinde elesteter, óz qoǵamdaryńyzǵa maqtanysh sezimin týǵyzarlyq jubaı bolýǵa jazsyn!

Sizderdiń ózderińiz de bolashaqta jas urpaqtyń tárbıeshisi atanasyzdar. Bolashaq urpaqtyń tanymy men tálimi sizderdiń búgingi kúnde jınaǵan jan saraılaryńyzdaǵy kókirek qundylyqtaryńyzdan bastaý alyp jatady. Demek, tárbıe tamyry áride. Sizderdi óz qoǵamdaryńyz shyn mánindegi rýhanı qundylyqtarmen qarýlanǵan jastar leginiń ókili retinde tanıdy jáne bolashaqtyń túpqazyǵyna jan-jaqty baǵyt silterlik endigi eresekter sapyn tolyqtyrarlyq jubaılar bolady dep úmit etedi. Táńiri tilekterińizdi adal murattaryńyzǵa jetkizsin!

Sizderdiń qorshaǵan qoǵamdaryńyz dál qazirgi sátte Sizderge úlgili shańyraqtyń laıyqty turpattaǵy Otaǵasy men Otanasy bola alady dep senim artty. Aldaǵy jubaılyq ǵumyrlaryńyz Sizderge kóptiń senimine jaryqshaq túsirmesteı jarqyn da nyq, nurly da maǵynaly túrde ómir súrýdi násip etsin!

Mine, Sizderge de baqyt kúniniń tańy atty. Sol kúnniń bastaý saǵaty esterińizde udaıy saqtala otyryp, alǵa jetelep otyrýshy eki júrekke teń, ortaq qundylyqqa aınalsyn! Sol baqyt tańynyń nury appaq otaýlaryńyzdy únemi altyn sáýlege malyndyryp, sizderge udaıy qudiretti qýat berýshi ǵajaıyp kúshke aınalsyn!

Mahabbat - adamǵa zor jaýapkershilik pen mindet júkteýshi qasıetti uǵym. Ol - ádemilik pen ádeptiń ólshemi, jan-dúnıe ásemdiginiń aınymas serigi. Sizder endigi sátte óz mahabbattaryńyzdyń ǵajaıyp seniminen qýat ala otyryp, ekinshi syńaryńyz úshin ómir súrýge bel býdyńyzdar. Sizder osynaý jolǵa batyl qadam basýshysyzdar. Sol jolda ózderińizdiń dostaryńyz ben qurbylaryńyz sizderdiń osynaý júrek sezimderińizdiń turaqty túrde jańǵyryp otyrýshy qýatty qorǵanǵa aınalar kúsh bolýyn shyn júrekten tileıdi.

Qurmetti shańyraq kóterýshi Jas jubaılar!

Búgingi qurǵan shańyraqtaryńyz qutty da berekeli bolsyn! Sizderdiń aldaǵy ómirlerińiz tek baqytty kúnderdiń tizbeginen quralsyn! Sol tizbek eshqashan da úzilmesin!

---