InfoHub Logo

Qazaqstandaǵy túrik lıseıleriniń jumysyn Qazaqstan men Túrkıa bilim berý mınıstrlikteriniń mamandarynan qurylǵan birlesken jumys toby tekseredi dep jazady Qazaqparat.

Bul týraly búgin Nursultan Nazarbaev ekijaqty kelissóz nátıjesi boıynsha baspasóz konferensıasynda túrik jýrnalıseriniń suraqtaryna jaýap berý barysynda málimdedi.

«Qazaqstanda jumys istep turǵan mektepter - bizdiń memlekettiń mektepteri. Bul mektepterde tórt tilde oqytylady. Qazaq, orys, aǵylshyn jáne túrik tilinde. Mektepterde jumys isteıtin oqytýshylardyń 90 paıyzy Qazaqstan azamattary jáne tek 8-9 paıyz oqytýshylar Túrkıadan balalaryn oqytý úshin keledi», - dedi Nazarbaev.

Memleket basshysy mektepterdi jergilikti atqarýshy organdar qarjylandyratynyn atap ótti.

«Túrkıaǵa qarsy jumys isteıtin kúshterdi biz esh ýaqytta qoldamaımyz. Bul bizdiń múddemizge jatpaıdy. Sondyqtan biz búgin elderimizdiń bilim berý mınıstrlikteri jumys tobyn quryp, ár mektepti tekseredi dep ýaǵdalastyq», - dedi Nursultan Nazarbaev.

Sonymen qatar memleket basshysy bul lıseıler tekserilgenin jáne olardan zańsyz eshteńe tappaǵanyn atap ótti.

«Biz júrgizgen tekseriske sáıkes olar eshbir qazaqstandyq zańdardy buzǵan joq. Oqytý baǵdarlamasy QR bilim mınıstrliginiń oqý baǵdarlamasy negizinde jasalady», - dep habarlady Nazarbaev.

Memleket basshysy eger bul mektepterde Túrkıaǵa qarsy baǵyttaǵy adamdar bolsa, onda Qazaqstan muny esh ýaqytta qoldamaıtynyn, tıisti shara qoldanatynyn jáne Túrkıanyń barlyq ótinishterin oryndaıtynyn qosty.

«Barlyq osy mektepterde ata-analar óz balalaryn oqytqany úshin aqy tóleıdi. Bilim berý sapasy óte joǵary. Bilim alatyn 9 myń balanyń birneshe myńy álemdik olımpıada, baıqaýlardyń jeńimpazdary, olardyń barlyqtary ýnıversıtetterge túsedi», - dedi Nazarbaev.

Qazaqstan prezıdenti Qazaqstanda túrik lıseılerin qurý marqum Týrgýt Ozal kezinde bastalǵanyn eske aldy.

«Biz bul mektepterdi eger jastarymyz bizdiń tilderdi bilse, bir-birine jaqyn bolady degen nıette qurdyq», - dep sózin túıindedi Nursultan Nazarbaev.

---