InfoHub Logo

Bolys saılaýynda Serdaly bolys bola almaı qalypty. Buryn qasynan ketpeıtin jekjattary, aǵaıyn-týmalary syrt aınalyp jaılaýǵa kóship, Serdaly ata qonysy — Ótegen-Nurymbette qozǵalmaı otyryp qalady. Jetes janyna joldastaryn ertip, Serdalyǵa kelip:

— Habarlas! — deıdi. Úıinen shyqqan Serdaly qonaqtaryn attan túsirip, úıge kirgizip az-kem amandyqty surasqan soń, bosaǵada ilýli turǵan júgen, noqtaǵa qolyn soza bergende Jetes:

— Serdaly shyraǵym, sen bir jaqqa júreıin dep yńǵaılanyp tursyń ǵoı. Júrme. Aǵaıyn bar bolsań, kóre almaıdy, joq bolsań, bere almaıdy. Asyqtaı ajaryńdy mal surap ketirme. Qolyńda ne bar sony soı, eshqaıda barma, — deıdi.

Serdaly saýyp otyrǵan eki bıesiniń bireýiniń qulynyn soıyp, qonaqasy beredi.

Erteńine júrer aldynda Jetes Serdalyǵa:

— Ári bergen batam bolsyn, ári aqylym bolsyn. Bir aýyz sóz aıtaıyn. Tyńda. Er jigittiń azyn-aýlaq toqtaǵan yqpalyn eki nárse ashady. Onyń bireýi — uzaq sapar, ekinshisi — jaqsy at. Uzaq sapar joldyń saǵan yńǵaıy joq, al jaqsy attyń sáti kelip tur. Soǵan bizben birge júr. Atyńdy ertte, — depti.

Sol kúni úlken qalaǵa kelip qonyp, erteńine Serdalyny Úmbet bıge jiberedi. Jolǵa shyǵar aldynda Jetes:

— Úmbet ishki jurttan qunan tory degen júırik at ákelipti. Sony sura. Qulbaraq (ákesi) esine túsip, saǵan Úmbet bir atty berer. Eger sol at taqymyńa tıse, yqpalyń júre bastaıdy, — depti Jetes.

Serdaly Úmbetke baryp, úsh-tórt kún qonaq bolady. Júretin kezinde Úmbet Serdalydan buıymyn suraıdy. Serdaly kelgendegi jumysyn aıtady. Sonda Úmbet oılanbastan:

— Osyny esińe salyp, maǵan jumsap otyrǵan Jetes qoı. Ras pa? — deıdi.

— Ras, — deıdi bul.

— Jaqsy, shyraǵym, atty bermesem, Qulbaraq tegin jatpas. Báribir bul at mańdaıyma syımas. Bereıin. Biraq bir attyń ketkeni eshteme emes-aý, eń qıyny bizdiń tóbeniń baǵy endi senderge aýdy. Qınaıtyny osy, shyraǵym. Kel, myna atqa min! Elińe qýanyp bara ǵoı, — dep atyna qutty bolsyn aıtyp, Serdalyny Úmbet jolǵa shyǵaryp salady.

Sodan bastap Serdalynyń baǵy órlep, eline dýaly aýyzdy ataqty adam bolypty.

---