InfoHub Logo

Avtory:
Ǵabıden QOJAHMET,
Qyzylorda qalasy

Jez qońyraý syńǵyry

Buıyrtady taǵdyr, shirkin, ár adamǵa nesibin,
Keshe emes pe ed mektep - uıa bularǵa ashqan esigin.
Endi, mine, sodan beri zýlap jyldar ótipti,
Mektebimen qoshtasar sát bularǵa da jetipti.

Uǵyndy ma arlylyǵyn, tátti ómirdiń nar júgin,
Aq bantıkpen qoshtasady qyz bala da dál búgin.
Búr jardy ma keýdesinde asaý sezim elim dep,
Adýyndaý erke uldyń da murty qapty tebindep.

Ańsaýshy edi keshe ǵana osy kúnge jetkenin,
Endi búgin sezim basqa, qıa almaı tur mektebin.
Qyz balanyń kirpiginde móldir tamshy irkildi,
Syr bermeıdi uldar jaǵy, qımasa da bul kúndi.

Qońyraýdyń syńǵyr qaqqan úni qulaq jarady,
Jez qońyraý bular úshin sońǵy ret án salady.
Bul bir shyndyq moıyndaıtyn kim - kimge de ras tym,
Otyrmaıdy endi qaıtyp partasyna klastyń.

Aıyrbastar kez keldi endi oqýshylyq qalamyn,
Tyńdamaıdy qaıtyp endi ustazynyń sabaǵyn.
Ómir - ana bularǵa da "sen eseıdiń, bil" deıdi,
Endi qaıtyp mektebinde oqýshy bop júrmeıdi.

Qımaıdy olar sol shákirttik kúz, kóktemin, qys, jazyn,
Ókinedi kúni keshe renjitse ustazyn.
Syńǵyrlaıdy qońyraýdyń qaıta - qaıta jez úni,
Syr beredi mundaı sátte jas júrektiń sezimi.

Qoshtasady mektebimen ómir - asý asady,
Bular ornyn búgin, mine, basqa tolqyn basady.
Jol beredi jas urpaqqa kele jatqan talapty,
Áz - uıadan túlep ushar qaǵyp erkin qanatty.

Asyrýǵa boıyndaǵy bilimi men biligin,
Ketedi me basqa jerde jalǵastyryp bilimin.
Basqa jerdiń gúlzar baǵyn múmkin baryp aralar,
Mektebine, bálkim, bir kún ustaz bolyp oralar.

Oralmaıdy oqýshy bop nege, nege biraq ta,
Jaýap izdep taba almaıdy eshkim mundaı suraqqa.
Óıtkeni bul - ómir zańy ózgerte almas esh adam,
Ózgerter tek qudiret bar: bir táńirim - jasaǵan.

Estiledi shalǵaılardan ómir - kúıdiń kúmbiri,
Armandarǵa jeteleıdi jez qońyraý syńǵyry.
Ushty uıadan, qalar artta tátti sezim - bala shaq,
Shaqyrady alystarǵa, shaqyrady bolashaq!

On jyldan soń...

Tal besigińnen tańǵajaıyp syr taba aldym,
Esińnen áli kete almaı júr - aý balań kún.
On kóktemnen soń oılarǵa toly ómirmen
Shákirttik shaqqa oraldyń.

Esińde áli balalyq syrda júzgeniń,
Estelik jibin on kóktem boıy úzbediń.
Oralyp qaıta óziń qaldyrǵan keshegi
Balalyq kúndi izdediń.

Saǵynysh sezim júrekte alaý jandyrǵan,
Ótkeni ras osynaý jylda san dýman.
Boıjetken qyzdyń shákirttik belgisi bir kezgi
Aq bantık qaıda qaldyrǵan.

Ótken kúnderdi aıttyń ba búgin ertek qyp,
Qalaısha mynaý az ǵana sátte erjettik.
Shákirttik shaǵyn eske alǵan anaý jigittiń
Kezderi qaıda tentektik.

On kóktem boıy ótipti dáýren, turmapty,
Ýaqyt atty ámirshi búgin til qatty.
Sandaǵan jyldar sabyrmen kelip boıyńnan
Balalyq kúndi urlapty.

Ótken bir shaqpen jarasa bilseń, janyń uq,
Tabıǵatyńnan shyn sezim jatsa tabylyp.
Oraldyń búgin oılarǵa toly kóńilmen
Keshegi kúndi saǵynyp.

Qaıǵy qylyshy torlapty - aý keıde aspandy,
Jabyǵyp kelip janardan búgin jas tamdy.
İzdediń qaıta júregiń muńǵa malynyp
Joǵaltyp alǵan dostardy.

Ótken bir kúnge aparyp qyz ben ulyńdy,
Ýaqyt - keme ózińe búgin buryldy.
Eseıip qansha ketseń de solaı, dostarǵa
Sezimiń bolsyn burynǵy.

Uǵynyp sony janymmen men de jaı tabam,
Boıyńnan seniń saǵynysh sazyn baıqaǵam.
Keshegi kúnge shákirttik dospen bir júrgen
Oralshy búgin qaıtadan.

Osylaı et te ásem bir ánge sal búgin,
Oralyp tur ǵoı óıtkeni saǵan bal kúniń.
Shattyqty kúnde ózderińe ǵana arnalǵan
Dýmanmen atsyn tań búgin!

Shákirt tolǵanysy

Kúni keshe munyń bári esimde,
Erkeleı kep týǵan jerdiń tósinde
Alǵash ret ashtym mektep esigin -
Qazynaly mol bilimniń besigin.

Ony oılasam, keýde jaılap ketedi órt,
Bilim - nurǵa basqam qadam tótelep.
Otyrǵyzdy partań mynaý seniń dep,
Alǵashqy ustaz ózi ákep jetelep.

Men osylaı bilim nárin terippin,
Bolmasa ustaz, ony qaıdan kórippin.
Sol úıretti, syryn bildim ómirde
"Álippedegi" qyryq eki áriptiń.

Dostar taptym men bul jerde jańasha,
Oıyn saldym úziliste jarasa.
Eske tússe, kóńil bir sát tolqıdy,
Bala kezgi ómir ár kez tamasha!

Jyljyp jyldar bir orynda turmady,
Bala shaqty ýaqyt kep urlady.
Keshe bala, búgin túlek bolyppyz,
Jas túlektiń jańǵyryqty qyrda áni.

Aıtshy, dostym, munyń endi nesi muń,
Terbetkenbiz mol bilimniń besigin.
Eseıtipti áldıimen ýaqyt,
Kez kelipti jabar mektep esigin.

Ustazdarmen qoshtasar sát kelipti,
Bolashaǵyń bolsyn deıdi kórikti.
Mine, eseıdiń, óz jolyńdy tapqyn dep
Áz - uıamyz aq batasyn beripti.

Qaq qanatty, irkilme endi, qomda da
Deıdi bizge jatyr alda jol dara.
Munyń ózi aıtýǵa tek jeńil - aq,
Mektebińdi qıa almaısyń sonda da.

Qıa almaısyń bala kezgi kóktemdi,
Qıa almaısyń jyly shýaq ótkendi.
Bir - aq sátte er jetkizip eseıtken
Ýaqytqa arta almaısyń ókpeńdi.

Mundaı sátte qıyn kóz jas tógilmeý,
Mundaı sátte qıyn eken egilmeý.
Dostar, qane, birge qanat qaǵalyq,
Qatar ushsaq bolar, bálkim, jeńildeý.