InfoHub Logo

Jyl basyna talasqan haıýanattar
Eń erte zamanda haıýanattar jyldyń basy bolýǵa talasypty. Sonda jylqy aıtypty:
- Men alysty jaqyn qylamyn. Kúshimdi kóredi, sútimdi ishedi, qylyma sheıin arqan, jip esedi. Adamǵa menen paıdaly mal joq, jyl aǵasy men bolamyn, – deıdi.
Túıe aıtady:
- Sen adamnyń jumysyn qylsań, suly, shóp asaıtyn tamaǵyń úshin qul boldyń, mine, men sen kótere almaıtyn aýyrdy kóterip, neshe aıshylyq alys jerlerge baramyn. Ash boldym dep, arpa, suly suramaımyn. Kóde bolsa, kóde, jýsan bolsa, jýsan, ne kez kelse, sony qorek etip, tabylsa, sý iship, tabylmasa, shólde de jolǵa júre beremin. Jyl basy bolý maǵan laıyq. Sıyr aıtady: - Adam egin ekse, menimen egedi, sútimdi ishedi, qurt - maı isteıdi, jyl basy bolý maǵan laıyq.
Qoı aıtady:
- Men bolmasam, qazaq úıin nemen jabar edi. Júnimdi alyp, kıiz basady, jabaǵymnan kıim tigedi, arqan, jip esedi. Sútimnen qurt - maı alady, sharýaǵa menen paıdalylaryń joq.
It aıtady:
- Men bolmasam, senderdiń kóbińdi ne urlap, ne qasqyr jep taýysar edi. Men senderdiń barshalaryńnyń baqtashyńmyn, dushpan kórinse, úrip, abalap, ıeme habar beremin.
Taýyq aıtady:
- Men bolmasam, kisi erte jumysyna barmaı, uıyqtap qalar edi. Men erte turyp, tań atty dep shaqyryp, habar aıtamyn. Kesh bolsa, jatar mezgil boldy dep, taǵy shaqyramyn.
Tyshqan ne aıtaryn bilmeı turady da bir túrli qýlyq oılap, jıylǵan kópke aıtady: - Bul talastan esh nárse ónbes, jyldy qarap turalyq ta kim buryn kórse, sol jyl basy bolsyn.
Ózgeleri qarap turǵanda, túıe óziniń boıyna senip: «Menen buryn kim kóredi?», – dep, tyshqannyń sózin qostaıdy. Bári qarasyp turady.
Birazdan soń tyshqan jorǵalap, túıeniń órkeshine shyǵyp otyrady. Kóp haıýan talasyp: «Biz kóremiz, biz kóremiz»,– dep turǵanda, eń bıikte otyrǵan tyshqandy kórip, esh nárse demepti.
Sonan soń jyldy bárinen buryn tyshqan kórip, habar berip, jyl basy bolypty. Túıe boıyna senip qur qalypty.
Ertegiler eline saıahat, ertegiler jınaǵy