InfoHub Logo

2012 jyldan beri alǵash ret Qazaqstanda jastar jumyssyzdyǵynyń deńgeıi tómendedi. Bul týraly búgin Astanada QR Memlekettik hatshysy Gúlshara Ábdiqalyqovanyń qatysýymen ótken kásiptik-tehnıkalyq bilim berý máselesine arnalǵan keńeste QR Densaýlyq saqtaý jáne áleýmettik damý vıse-mınıstri Birjan Nurymbetov málim etti.

«Búginde biz eńbek naryǵy aıasynda túrli boljamdar men taldaýlar júrgizýdemiz. Bul turǵyda bolashaqta elimizdiń kásiporyndary men uıymdary kásiptik-tehnıkalyq bilimniń kadrlarynda qajettilikti sezinetindigi baıqalýda. Máselen, aǵymdaǵy boljamǵa súıensek, qajettiliktiń 73 paıyzǵa jýyǵy qaıta óńdeý ónerkásibi salasynda, ıaǵnı taǵam jáne toqyma ónerkásibinde, sondaı-aq qurylyspen aýyl sharýashylyǵy baǵyttarynda bolmaq», - dep toqtaldy vıse-mınıstr.

Onyń sózine qaraǵanda, jyl saıyn eńbek naryǵyna 200 myńnan astam jastar, mektep túlekteri, orta-arnaıy jáne joǵary bilim uıymdarynyń túlekteri baǵytalady. Árıne, mektepti támamdaǵan jastardyń kóbisi kolejder men JOO-larǵa túsetini túsinikti.

«Kolejder men JOO túlekteriniń arasynda basym bóligi jumysqa turady. Alaıda jyl saıyn 70 myńǵa jýyq jas túlek jumyssyz qalyp, ózderine laıyqty qyzmet taba almaıdy», - dedi Nurymbetov.

Onyń aıtýynsha, degenmen de búginde jalpy alǵanda bul baǵyttaǵy úrdis ońtaıly kórsetkishti baıqatýda. 2012 jyldan beri alǵash ret Qazaqstanda jastar jumyssyzdyǵynyń deńgeıi jalpy jumyssyzdyq deńgeıinen tómen bolyp otyr.

«Osy tórt jylda jastardyń jumyspen qamtylýy 120 myń adamǵa ósti. Bul óz kezeginde óte qarqyndy ózgerip otyrǵan kórsetkish. Elde jumyspen qamtylǵan adamdardyń 2,3 mıllıonyn jastar qurap otyr. Elimizde jalpy jumyssyzdyq deńgeıi 5 paıyzdy qurap otyr, al búginde jastar jumyssyzdyǵy 4,5 paıyz deńgeıinde», - dedi vıse-mınıstr.

Avtor: Rýslan Ǵabbasov