InfoHub Logo

Jynystyq saýat taqyrybyn neǵurlym erterek qozǵasaq - nekesiz júkti bolyp qalýdyń, jynystyq jolmen qaýipti aýrý juqtyrýdyń aldyn alamyz. Bul týraly elordada ótken dóńgelek ústelde Y-PEER eriktiler jelisiniń jattyqtyrýshysy Kámıla Tuıaqbaeva aıtty.

«Qazaqstan Respýblıkasynyń zańnamasy boıynsha 14 jastan bastap qylmystyq jaýapkershilikke tartylady. 16 jastan bastap jumys isteýge jáne neke qıdyrýǵa bolady. Al nege osy jastan bastap ata-ananyń ruqsatynsyz dárigerge qaralý múmkindigi joq?», - deıdi Y-PEER eriktiler jelisiniń jattyqtyrýshysy Kámıla Tuıaqbaeva.

Onyń aıtýynsha, jynystyq saýatqa qatysty pándi mektep baǵdarlamasyna engizý adamnyń jaýapkershilikti sezine bilýine yqpal etedi.

«Bul pánde tek jynystyq qatynas týraly ǵana aıtylmaıdy. Onyń ne ekeni, saqtanbaǵan jaǵdaıda júktilik bolatyndyǵy, oǵan qyz bala da, ul bala da jaýapty ekeni, óz deneńdi qurmetteý, kim kóringendi jolatpaý týraly aıtylady. Nege qyz balaǵa «Sen bir adamǵa ǵana turmysqa shyǵyp, bir adammen ǵana jynystyq qatynasta bolý kereksiń« dep úıretip, ul balaǵa ne úshin úıretpeımiz? Jasandy túsik jasatqan qyz balanyń uıatsyz ekenin aıtamyz, al osy jerde soǵan sebep bolǵan er bala nege jaýapkershilikke tartylmaıdy?

15-16 jastan bastap qyz bala men ul bala bir-birine ózgeshe qarap, gormondar oınaı bastaıdy. Osyndaı tabıǵat zańdylyǵyn toqtatý ońaı emes. Bul taqyrypta neǵurlym erterek qozǵasaq, nekesiz júkti bolyp qalýdyń, jynystyq jolmen qaýipti aýrý juqtyrýdyń aldyn alamyz», - deıdi ol.

Aıta keterligi, dóńgelek ústeldi QR DSM «Qoǵamdyq densaýlyq saqtaý ulttyq ortalyǵy» jáne «Densaýlyq saqtaýdy damytý respýblıkalyq ortalyǵynyń» uıymdastyrdy.

---