InfoHub Logo

Qazaqstan ustazdarynyń ulttyq biliktilik testileýi osy jyldyń sáýir aıynda bastalady. Bul týraly Bilim jáne ǵylym mınıstrliginiń aparattyq otyrysynda vıse-mınıstr Sholpan Karınova málim etti.

«Elimizde 2018 jyly muǵalimderdi atestattaýdyń jańa júıesi engizilgeni barshaǵa málim. «Pedagog mártebesi týraly» zań aıasynda buıryqqa ózgerister engiziledi. Endi barlyq bilim berý uıymdarynyń, sonyń ishinde mektepke deıingi uıymdardyń, mektepterdiń, tehnıkalyq jáne kásiptik bilim berý uıymdarynyń, qosymsha bilim berý uıymdarynyń muǵalimderi osy erejeler negizinde atestattaýdan ótedi. Atalǵan baǵyttar boıynsha qarjylandyrý barlyq sanattar úshin jalaqyny 30-dan 50 paıyzǵa deıin kóterý kezinde muǵalimderdiń sanatyn jaqsartý maqsatynda respýblıkalyq búdjetten bólinedi», - dedi Sholpan Karınova.

Vıse-mınıstr sonymen qatar 2020 jylǵa deıin sanattar tek mektep pedagogtaryna berilip kelse, qazirgi tańda mektepke deıingi, orta, tehnıkalyq jáne kásiptik bilim berý salasyndaǵy muǵalimderdiń bári de testen ótýge múmkindik alǵanyn jetkizdi. Onyń aıtýynsha, bıyldan bastap muǵalimder biliktilik testinen óte alady.

«2019 jyldyń qarasha-jeltoqsan aılarynda birinshi ret kompúterlik formatta test ótkizdik. Bıyl da testileýdi kompúterlik formatta ótkizý josparlanyp otyr. Ár oqytýshyǵa jeke derbes kompúter beriledi. Suraqtardyń bazasy da bar. Búgingi kúni test jańartyldy. Muǵalimderdiń jalaqysy 1 qyrkúıekten bastap ósýi úshin osy jyldyń sáýirinen bastap biliktilik testileýinen ótý múmkindigi jolǵa qoıylady», - dedi Sholpan Karınova.

---