InfoHub Logo

2019-2020 oqý jylynyń basynda Qazaqstanda 125 joǵary oqý orny jumys istedi. Bir jyl ishinde joǵary bilim salasynda kórsetilgen qyzmetterdiń kólemi 10 paıyzǵa ósti.

Atalǵan bilim ordalarynyń 84-i nemese 67,2 paıyzy - jeke menshik joǵary oqý oryndary (JOO). JOO-lardyń basym bóligi elimizdiń basty úsh iri qalasy - Almaty (41 JOO), Nur-Sultan (15) jáne Shymkentte (10) shoǵyrlanǵan.

Al stýdentterdiń jalpy sany - 604,3 myń. Bul buǵan deıingi oqý jylyndaǵy stýdentter sanynan (542,5 myń) 11,4 paıyzǵa kóp.

Jalpy, stýdentter sanynyń 79,6 paıyzy - kúndizgi bólimde, 14,9 paıyzy - syrttaı jáne 5,5 paıyzy - keshki bólimde bilim alady. Bul rette barlyq stýdentterdiń 39,9 paıyzy memlekettik joǵary oqý oryndarynda oqıdy.

Memlekettik bilim granty esebinen oqıtyn stýdentterdiń sany - 180,1 myń (29,8 paıyz), aqyly negizde oqıtyndar - 424,3 myń (70,2).

Osy oqý jylynyń basynda respýblıka JOO-larynda stýdentterge bilim beretin oqytýshylardyń sany 38,5 myń adamǵa jetti. Onyń ishinde 3,3 myń (8,5 paıyz) adam - ǵylym doktory, 12,7 myń (33,1) - ǵylym kandıdaty, 2,5 myń (6,4) - profesor, 5,9 (15,3) myń oqytýshynyń - dosent dárejesi bar. Fılosofıa doktory ǵylymı dárejesi bar oqytýshylar - 2,6 myń (6,8 paıyz), beıin boıynsha doktorlar - 235 (0,6), magıstr akademıalyq dárejesi bar oqytýshylar - 13 myń (33,9).

2019 jyldyń qańtar-qyrkúıeginde joǵary bilim salasyndaǵy qyzmetterdiń kólemi 229,5 mlrd teńgeni qurap, bir jyl ishinde 10,8 paıyzǵa ósti. 2018 jyldyń dál osyndaı kezeńindegi soma 207,1 mlrd teńge bolǵan edi.

Óńirlik shekte joǵary oqý oryndary kórsetken qyzmetterdiń eń kólemi Almaty qalasynda tirkelip, 84,8 mlrd teńgeni qurady. Bul el boıynsha jalpy somanyń 37 paıyzyna teń. Úzdik úshtik qatarynda Nur-Sultan qalasy (57 mlrd teńge) men Qaraǵandy oblysy (14,7 mlrd teńge) bar. Sonymen qatar TOP-5 óńirge Shymkent qalasy (12,8 mlrd teńge) men Aqtóbe oblysy (9,6 mlrd teńge) kiredi. Atalǵan bes óńirdiń joǵary bilim salasynda kórsetken qyzmetteriniń jalpy kólemi 178,9 mlrd teńgeni quraıdy.

---