InfoHub Logo

Búgin elimizde joǵary oqý oryndaryna talapkerlerdiń qujattaryn qabyldaý bastaldy.

QR Ǵylym jáne joǵary bilim mınıstri Saıasat Nurbek osy naýqannyń qalaı bastalǵanyn kórý úshin L.Gýmılev atyndaǵy Eýrazıa ulttyq ýnıversıtetine baryp, bilim ordasynyń qyzmetkerlerimen, talapkerlermen kezdesti.

«Búginnen bastap Qazaqstannyń búkil óńirlerinde joǵary oqý oryndaryna qujat qabyldaý naýqany bastaldy. Jergilikti joǵary oqý oryndarynyń negizinde jáne ulttyq testileý ortalyǵynyń negizinde qujattar qabyldanady. Bıyl jalpy magıstratýraǵa, doktorantýraǵa jáne bakalavrıatqa 88 111 grant bólindi. Bul byltyrǵymen salystyrǵanda 16 paıyzǵa kóp. Olardyń ishinde 73 myń grant bakalavrıat baǵdarlamalaryna arnalǵan. Bıylǵy basty erekshelik, Prezıdent tapsyrmasy boıynsha negizgi basymdyq tehnıkalyq-ınjenerlik mamandyqtarǵa berilgen. Granttardyń 60 paıyzy ınjenerlik, tehnıkalyq mamandyqtarǵa bólindi. Osy jyldan bastap osyndaı basymdyq saqtalady»,- dedi vedomstvo basshysy.

Onyń aıtýynsha, qujat qabyldaý naýqany búkil joǵary oqý oryndarynyń negizinde uıymdastyrylǵan.

«Kez kelgen azamat, talapker kelip, qujattaryn ne óz qolymen, ne vırtýaldy qabyldaý arqyly tapsyra alady. Búgin ózderińiz kórgendeı, kez kelgen joǵary oqý orny Zoom arqyly, Teams arqyly arnaıy vırtýaldy qabyldaýǵa búkil qujattaryn tapsyryp, keıin poshtamen joldaýǵa múmkindigi bar», - dedi Saıasat Nurbek.

Sondaı-aq, ol qujattardy onlaın rejımde tapsyrý múmkindikteri týraly málimet berdi.

«Birneshe jyldan beri oqýǵa qujatty onlaın rejımde tapsyrý qoldanysta bar. Iaǵnı, «Elektrondy úkimet» portaly arqyly tapsyratyn. Ony biz pysyqtap jatyrmyz. Tamyz aıynda daıyn bolady. Tamyz aıyndaǵy magıstratýra men doktorantýra talapkerlerin tolyqqandy «Elektrondy úkimet» portaly arqyly qabyldaımyz. Kelesi jylǵa da úlken daıyndyq josparlap jatyrmyz», - dedi mınıstr.

Eske salsaq, pandemıadan keıin eldegi joǵary oqý oryndarynyń bári dástúrli bilim berý formatyna kóship, oqý aqylaryn qaıta naqtylaǵan bolatyn.

---