InfoHub Logo

Kátken aýdan ortalyǵynda turady. Mamandyǵy — sý tehnıgi. Keıde sharýashylyqtyń sý júıesin teksere kelgende Serjandardyń úıine soǵyp ketedi.

Ózi osy úıge jıen. Ony balalar jaqsy kóredi. Úsh dóńgelekti motosıklin tóńirektep, odan jalyqqanda moıynyna asylady. Záýde bir asyǵys jumysy bolmasa, qydyryp qaıtýshy edi. Muny jaqsy biletin naǵashy inileri jıen aǵasyn búgin de qýana qarsy aldy. Sonymen birge olar ájeleriniń jyly-jumsaq tátti-dámdini sharýa qaljyratqan Kátkenniń aldyna qoıatynyn da jaqsy biletin edi. Úıirilip qasynan shyqpaıtyn.

Ádetinshe ájesi beshpentiniń qaltasynan tastamaıtyn kiltpen býfettiń qaqpaǵyn ashyp jatyp:

— O, toba, áneýgúni ákelip qoıǵan órik-meıiz taǵy da azaıyp kalypty, — deıdi.

— Oı, apa-aı, ylǵı osylaı deısiz. Sirá, tyshqandardyń isi shyǵar, — Kátken qarqyldap kúledi.

— Qaıdam... Bul úıde tyshqannyń quryǵanyna talaı zaman.

— Onda qyzyq eken.

Kátken ornynan kóterilip, býfettiń ishine úńildi. Órik-meıiz, qant-shaı negizinen býfettiń astyńǵy bóliginde, al ústinde ydys-aıaqtar turatyn edi. Ornyna qaıtadan kelip jaıǵasqan ol dóńgelek stoldy qorshaı otyrǵan inilerin kóziniń astymen baǵyp, mıyǵynan jymyń etti. Eshkimniń oıyna kelmeı júrgen aılany júzege asyrǵan qaısysy boldy eken, á? Shaı ishilgen soń:

— Apa, men birer saǵattaı kóz shyrymyn alaıyn. Uıyqtap ketsem, oıatarsyz, — dep Kátken tórgi bólmedegi dıvanǵa baryp qısaıdy.

Sál ýaqyt ótpeı-aq, as úıge mysyq tabandap bireý kirdi. Kátken ótirik uıyqtaǵansyp, kózin juma qoıdy. Serjan jaqyn mańda sezikti eshkimniń joqtyǵyna kózi anyq jetkendeı býfettiń qaýsyrma esigi ústindegi tartpany sýyryp aldy. Aıaǵynyń astyna kishkentaı oryndyq qoıyp, úńireıgen bos jerden qolyn tómenge suqty da, ýystap kámpıt, meıiz, jańǵaq alyp shyqty. Tartpany ornyna qoıa bergende, selt etip artyna qarady.

— Oı, Serjan, sonyń bárin óziń jeısiń be? Maǵan da bershi.

Kátken býfettiń tartpasyn qolyna alyp, basyn shaıqady:

— Áı, baýyrym-aı, adamnyń oıyna kele bermeıtin qýlyqty kimnen úırengensiń?

Serjan murnyn tartqyshtap, ne isterin bilmeı tur. Búıtip masqara bolatynyn kim bilgen? Keshirim surasa qaıtedi? Eger ini-qaryndastary estise, «ury» degen jaman attan qutyla almaıtyny anyq.

— «Urlyq túbi — qorlyq» degendi estýiń bar ma? — dedi aǵasy qabaǵyn shytyp.

Serjan murnyn tartqyshtap, tómen qarady.

— Onda, baýyrym, uǵyp al! Urlyqpen nan tapsań, alysqa uzamaısyń. Kúnderdiń kúninde abyroıyń aırandaı tógilip, bedelden jurdaı bolatynyńa men kepildik beremin.

— Aǵa, keshirińizshi, — dep Serjan ary qaraı sóıleýge shamasy kelmeı, býlyǵyp turyp qaldy.

— Biraq men ketken soń taǵy da ejelgi ádetińe baspaqshysyń ǵoı.

— Joq, aǵa! Ras aıtamyn! — Serjan janarynan ytqyp ketken jasty qolynyń syrtymen súrtip: — Ras aıtamyn, aǵa, — dedi.

— Jaqsy. Seneıin sózińe. Sondyqtan bul týraly men eshkimge dáneńe de aıtpaımyn.

---