InfoHub Logo

Raýan tańerteńgilik papasy men ájesiniń kúbir-kúbir áńgimesin estip qaldy. Uqqany: búgin mamasynyń týǵan kúni eken. Aıtpaqshy, ápkesi Merýert pen aǵasy Erkin sońǵy kezderi jumysbasty bolyp ketken edi. Ápkesi sabaqtan kelisimen keste tigýge otyrady, al aǵasy áldeqandaı raketanyń nobaıyn jasap áýre. Endi túsindi. Olar da mamasyna syılyq daıyndap júr eken ǵoı.

Osydan keıin-aq Raýannyń mazasy ketti. Ájesi kúıbeńdep as úıde júr. Buǵan nazar da aýdarmaıdy. Ápkesi sıaqty keste tigý de, aǵasy tárizdi raketa qurastyrý da qolynan kelmeıdi. Birinshi synypqa barǵany jaqynda, ony qaıdan bilsin? Biraq mamasynyń týǵan kúnine syılyq usynbaıtyny janyna qatty batyp tur.

«Jaz kúnderi bolsa ǵoı, — dep oılady Raýan, — onda úıleriniń túbindegi jasyl baýdan bir býda gúl terip ákelip, súıikti mamasyna syılar edi». Raýan sharasyzdana kúrsinip, aq qyraý órnek salǵan terezeden dalaǵa kóz tastady.

Kenet sharbaqtyń joǵary bóligindegi beldeýden tómen qaraı sorǵalap turǵan muz súńgisine kózi tústi. Móp-móldir, áınekshe jyltyrlaıdy. Alaqaı, tabyldy! Mamasyna múz súńgisiniń birnesheýin nege tartý etpeske. Aq naýattaı qytyrlaq dámi qandaı shirkinniń!

Raýan ájesine bildirmeı dalaǵa shyqty. Boı jetetin jerde emes, muz edáýir bıikte. Súp-súıir ótkir ushynan móldir monshaq tamshy sorǵalaıdy.

Appaq ulpa qardan jentektep aldy da jiberip qaldy. Mundaı sáttilik bola bermes. Nysanaǵa dál tıgen qar jerge eki-úsh súńgini ushyryp túsirdi.

Keshkisin qonaqtar merekelik dastarqanǵa jınaldy. Kózildirikti aǵaı sóz sóıledi. Sonan soń mamasyna qonaqtar jáne papasy syılyqtar usyndy. Al ápkesi men aǵasynyń tartýyna mamasy ǵana emes, qonaq kisiler de rıza boldy.

— Papa, mamama meniń de ázirlegen syılyǵym bar.

Muny qonaqtar da estip qoıypty.

— Oho, jigit boldy degen osy!

— Jaraısyń, Raýan!

— Káne, kórsetshi syılyǵyńdy.

Olar jer-kókke syıǵyzbaı maqtasyp jatyr. Raýan bólmesine júgire jóneldi. Mássaǵan! Tarelkaǵa salyp, terezeniń aldyna qoıǵan kúmis súńgiden túk te qalmapty. Syılyǵynyń erip ketkenin endi ǵana bilgen ol ókinishten jylap jibere jazdady. Ulynyń keshikkenine mazasyzdanyp, bólmege engen papasy mán-jaıdy túsinip, eriksiz qarqyldap kúlip jiberdi. Syılyq týraly áńgimeni estigen qonaq apaılar men aǵaılar da máz-meıram. Ásirese aǵasy ishin basyp kórshi bólmede domalap jatyr. Raýannyń janaryna jas monshaqtary irkildi.

— Aınalaıyn, balapanynan! — Mamasy Raýandy qapsyra qushaqtap, keýdesine qysty. — Káne, betimnen súıshi.

Bul anasynyń betinen shóp ótkizip súıip aldy.

— Mine, maǵan osydan artyq syılyqtyń keregi de joq, — dedi mamasy.

Raýannyń júzi qýanyshtan bal-bul janyp, aǵasyna qoqılana qarady.

---