InfoHub Logo

Atasynyń tapsyrmasyn oryndap tastamaqshy bolyp, Qaıyrbek qoraǵa qaraı bettedi. Darbazanyń syrtynan bireýdiń ysqyrǵany estildi.

— Qaıyrbek, júr kettik. «Birlik» aýlynyń balalary kelipti. Osy joly olardy nólmen qatyrmasaq pa?!

— Áttegen-aı, á! — Qaıyrbek basyn shaıqady. — Atam fermadaǵy bir tanysynan esektiń qamytyn alǵan eken. Sony aparyp tastarsyń dep edi.

— Óı, bar bolǵany sol ma? — Jaqyp kóńildene kúlip qoıdy. — Keshke deıin áli talaı ýaqyt bar. Úlgeresiń... Kóp qıqańdy qoıyp, bizben júr. Olardan ótken jolǵy qarymtany qaıtarmasaq, bolmaıdy. Kezdese ketse, mazaq qylady.

Qaıyrbek jelkesin qasyp sál turdy da:

— Meıli, endeshe, — dep, balalarmen birge fýtbol alańyna tartty. Jolshybaı atasy kezdesti.

— Qaıyrbek shyraǵym, qamytty aparyp berdiń be?

Qaıyrbek ne derin bilmeı, abdyrap:

— Iá, ata, aparyp tastadym, — dedi.

— Áp, bárekeldi. Órkeniń óssin, qaraǵym! — Atasy rıza keıippen Qaıyrbekke kózin syǵyraıta qarap, kúmis saqalyn ýystaı sıpap qoıdy.

Qaıyrbek úıge keshtete oraldy. «Birlik» fýtbolshylaryn oısyrata utqannan keıin, masattanǵan balalar Qarakólde ábden asyr saldy. Kóldiń ortasyndaǵy araldan búldirgen terdi, jasyrynbaq oınady. Oıyn qyzyǵyna berilgeni sonshalyq — kúnniń batqanyn da baıqamaı qaldy.

Úı-ishi keshki asqa otyrdy. As úıde ájesimen amandasqan bireý dabyrlaı kirip keldi.

— Kesh jaryq!

— Oý, Keldenbisiń? Joǵary shyq.

Atasy kóńildene daýystap, keshki qonaqty tórge shaqyrdy.

— Shyǵamyz ǵoı. Aıtpaqshy, qurdas, qartaıǵanda ótirik aıtatyn bolǵanbysyń? Búgin alasyń degen qamyt qaıda? Úıdegiler «qamyt ákelgen pendeni kórmedik» dep ant-sý ishedi.

— Aparmaǵany qalaı? Qaıyrbek shyraǵym...

Atasy túsin sýytyp, nemeresine qarady. Qaıyrbek uıattan kirerge tesik tappaı, kózimen jer shuqyǵan qalpy únsiz otyryp qaldy.

---