Júregimde júrgeni-aı bir qaýiptiń,
Sabaǵyndaı shyrmaıdy shyrmaýyqtyń
Úmitpenen, armanmen, kúdikpenen,
Ótip jatyr zymyrap zyrlaýyq kún.
...Sheshem meniń eńkeıip bara jatyr,
Qaı kúni keler eken nala «batyr».
Jel maǵan sybyrlaıdy aıat oqyp:
«Bir kúni aırylasyń, qara da tur».
Kim bilsin, kóńil, qandaı kúı keshedi,
Qańyrap qalýy ońaı úı keshegi.
Alandaımyn altynym joǵalǵandaı,
Anamnyń kórinbese kımeshegi.
Sheshem meniń - ıilgen suraý belgi,
Sál ǵana shattyq kórdi, jylaý kórdi.
Qalaı ǵana qalpyna keltirersiń,
Daýyldar maıystyrǵan mynaý beldi.
Ulyń seni jumaqqa bergisi joq,
Jumaǵyń da tamuq qoı - kórgisiz ot.
Osylaı kóz aldymda júre bershi,
Suraýly sóılemderdiń belgisi bop.

---