InfoHub Logo

Sabaqtyń taqyryby: Júsipbek Aımaýytov
Sabaqtyń maqsaty:
1. Bilimdilik: Sýretker - jazýshy Júsipbek Aımaýytovtyń ómiri men shyǵarmashylyǵy týraly túsinik berý, jazýshynyń azamattyq tulǵasy, týǵan halqyna, onyń ádebıeti men mádenıetine sińirgen eńbegin oqýshylardyń ózderine izdendire otyryp meńgertý; alǵan bilimderin basqa salalarda aqparat kózi retinde qoldana bilýge úıretý.
2. Damytýshylyq: ádebı shyǵarmashylyq sıpatta jazba jumystaryn oryndaı alýǵa úıretý, oqýshylardyń ózindik kózqarasynyń qalyptasýyna yqpal etý, óz oılaryn erkin, naqty jetkize bilý qabiletin, til baılyǵyn, sózdik qoryn damytý, óz betimen izdenýge, oı qorytýǵa daǵdylandyrý.
3. Tárbıelik: jazýshynyń shyǵarmashylyǵy arqyly oqýshylardy elin, ádebıeti men tarıhyn súıe bilýge, adamgershilikke, qaıyrymdylyqqa, ımandylyqqa tárbıeleý.
Sabaqtyń mindeti:
1. Mazmunǵa baılanysty mindet: shyǵarmalarynyń mazmunymen tanysa otyryp, taqyryptaryna qaraı toptaıdy, mátin mazmunyn ómirmen baılanystyrady;
2. Synı oılaýdy damytýǵa baılanysty mindet: oqýshylar oı talqysyna túse otyryp, ózara pikir almasady, is - áreketterin taldaıdy;
3. Toptyq mindet: oqýshylar óz oılaryn qorǵaı bilýge úırenedi, bir - birin tyńdaıdy, tolyqtyrý arqyly mátin mazmunynyń túsiniksiz jerlerin aıqyndaıdy.
Sabaqtyń tıpi: aralas sabaq
Sabaqtyń túri: izdený sabaǵy
Sabaqtyń formasy: ujymdyq, toptyq, jekelik
Sabaqtyń ádisteri: túsindirmeli – ıllústrıatıvti, reprodýktıvtik,
problemalyq (evrıstıkalyq, jartylaı izdený), STO
Sabaqtyń tásilderi: áńgimege tarta otyryp dáris berý, kórsetý, baıandaý,
ózdik jumys, qosymsha ádebıettermen jumys
Pánaralyq baılanys: ádebıet teorıasy, tarıh, pedagogıka, qazaq tili
Sabaqtyń kórnekiligi: Júsipbek Aımaýytov portreti, shyǵarmalary, ınterbelsendi taqta, syzbalar, kesteler, kespe qaǵazdar, sýretter

Sabaqtyń barysy
İ. Uıymdastyrý kezeńi
İİ. Jan - jaqty bilimin tekserý (Synypty tórt topqa bólý)

İİİ. Jańa bilimdi meńgertý
1. Oı ashar
- Júsipbek Aımaýytov týraly ne bilemiz?
2. Muǵalim sózi
Qazaq ádebıeti alyptarynyń biri – Júsipbek Aımaýytov. Onyń qazaq ádebıetiniń janr jaǵynan damytýdaǵy eńbegi orasan zor. Ol – aqyn, prozashy, pýblısıs, synshy, teatr rejıseri, aýdarmashy, pedagog boldy. Bir ózi ádebıet pen ǵylymnyń ár salasynda eńbek etti. Qazaq ádebıetin proza, dramatýrgıa janry jaǵynan qalyptastyrýdy jáne mektepter men oqý oryndarynyń oqýshylaryna arnap birneshe oqý quraldaryn jazýǵa qatysqan. Osyndaı ádebıetimizdiń, teatrdyń, ǵylymnyń damýyna aıryqsha qyzmet etken qalamgerdiń eńbekteri 60 jyl boıy oqýshynyń nazarynan tasada qalyp keldi. Elimizdegi qaıta qurýdyń nátıjesinde bolǵan ózgeristerden keıin ǵana – 1988 jyldan bastap Júsipbek Aımaýytovtyń ómiri men eńbekteri jáne maqalalary jaryq kóre bastady. Jazýshy Júsipbek óz eline kóp eńbek sińirgen.
Jan - jaqty óner ıesi, segiz qyrly bir syrly daryn Júsipbek Aımaýytov 1889 jyly (keı derekterde 1890 jyly) qazirgi Pavlodar oblysy, Baıanaýyl aýdany, Qyzyltaý atyrabynda týǵan. Ákesi Aımaýyt kedeı bolǵanymen, arǵy atalary Dándebaı men Qýan tekti, dáýletti, ataq - abyroı bitken, el arasyndaǵy bilikti kisiler. Jas kúninen Júsipbek birge týǵan baýyrlary Ahmet, Jaqypbek sekildi arabsha hat taný, oqý ústine, aǵash sheberligi, temir ustalyǵy ónerin qatar úırenedi. On bes - on alty jasynda ózi umtylyp, úı ishiniń ruqsatynsyz Pavlodarǵa qashyp baryp, oryssha - qazaqsha eki synypty mektepke túsedi, bir jaǵynan bala oqytyp, qarajat taba júrip, oqýyn 1914 jyly bitiredi de, Semeıdegi oqytýshylar semınarıasyna túsedi, ony 1918 jyly aıaqtaıdy. Qazaqstan Keńesteriniń quryltaıyna delegat, Oqý kommısarıatynyń kollegıa múshesi bolý, «Qazaq tili» gazetin óńdeý, «Aq jol» gazetinde isteý, Shymkenttegi pedagogıkalyq tehnıkýmynyń dırektorlyǵy – mine munyń bári Júsipbek Aımaýytovtyń jańa ómirdi ornyqtyrý jolyndaǵy kúres jolyn, ómir belesterin kórsetedi. 1929 jyly bastalǵan zobalań kezinde qarmaqqa ilingen Júsipbek Aımaýytov 1931 jyly atylǵan.