InfoHub Logo

Júz jyl jyrlaǵan júrek
(Jambyl Jabaev ómiri men shyǵarmashylyǵy)

Sabaqtyń maqsaty: oqýshylardyń Jambyl Jabaevtyń ómiri men shyǵarmashylyǵynan alǵan bilimderin tekserý, bilim deńgeıin kóterý.
Sabaqtyń mindetteri:
- oqýshylar óz betinshe izdenedi, aqyn týraly bilimderin keńeıtedi, tolyqtyrady.
- oqýshylardyń aýyzeki sóıleý tilderi damıdy, sóz qoryn baııdy, este saqtaý qabiletteri damıdy.
Sabaqtyń ádis - tásili: zertteý jumystary, Esse strategıalary
Sabaqtyń kórnekiligi: báıterek sýreti, Jambyl kesenesi, Jambyl taýynyń sýreti, baǵdarsham, bilim aǵashy, vıdeotaspa, marker, plakat, stıker t. b.
Sabaqtyń barysy: Sabaqqa oqýshylardyń nazaryn aýdarý.
Topqa bólý «Pazyl» ádisi

İ. Qyzyǵýshylyqty oıatý kezeńi
- Balalar, bárimiz búgingi sabaǵymyzdyń taqyrybyna kóńilimizdi aýdaraıyqshy, ol nege «Júz jasaǵan báıterek» dep atalady dep oılaısyńdar?

Dápterlerine kúndi, taqyrypty jazǵyzý.
- Aqyn Sáken Seıfýllın: «Jambyl jyrlary teńiz túbinde shashylyp jatqan marjan syqyldy. Ony jınap alyp, halyqtyń qolyna berý – bizdiń árqaısymyzdyń azamattyq boryshymyz» degen eken. Sondyqtan biz onyń ómirin, jyrlaryn bilýimiz kerek.
Jambyl atamyz jaıly derekter óte kóp, kitap qory da bar, túsirilgen kórkem fılmdar de, derekti fılmder de bar. Qazir men senderdiń nazarlaryńa myna beınetaspany usynǵym keledi (beınetaspany kórsetý).
Balalar, shynynda da, eki dáýirdiń jyrshysy bolǵan J. Jabaev týraly qanshalyqty biz biledi ekenbiz? Endeshe, búgingi sabaǵymyzdyń maqsaty – aqynnyń ómiri men shyǵarmashylyǵynan alǵan bilimderimizdi jınaqtap, qosymsha málimetter arqyly ár qyrynan zerttep kórý.

İİ. Maǵynany ajyratý kezeńi
Synyptaǵy oqýshylar 3 topqa bólinip otyrady. Tapsyrmalaryn sol jerde tańdap alady. Tapsyrmalary konvertte. Baǵalaý paraǵy taratylady.
1 - top «Ómiri – ańyz, ózi – abyz»
Jambyl atamyzdyń ómirinen alynǵan taǵylymdy derekter, sýretter, fotosýretter boıynsha zertteý jumystaryn jasaıdy.
2 - top «Jambyl – aıtysker aqyn»
Aıtys óneri týraly, túrleri jaıly maǵlumat bere otyryp, Jambyl atamyzdyń sýyryp salma aqyn ekendigin dáleldep, Qulmambet aqynmen aıtysyn taldaıdy.
3 - top Soǵys taqyrybyndaǵy óleńderi

İİİ. Oı tolǵanys kezeńi
«Jambyl baba, máńgi birge qazaqpen» shaǵyn esse

İV. Qorytyndy
- Búgingi sabaǵymyzda Jambyl atamyzdyń ómiri men shyǵarmashylyǵyn jan - jaqty zerttedik. Manadan aıtqandaryńa qosarym, «Egemendi Qazaqstan» gazetinde «Júregi júz jyl jyrlaǵan» degen maqala shyqty. Sodan bir úzindi keltire keteıin:
... 1957 jyly Muhtar Áýezov Úndistanǵa bir saparmen barypty. Onda onyń aty - jónin, «Abaı joly» romanyn úndiler jaqsy biledi eken, biraq ultyn bilmeıdi eken. Ultynyń qazaq ekenin bildirý úshin keltirmegen mysaly qalmapty. Bir kezde aýzyna Jambyl túsedi. Jambyldyń esimin ataıdy. Sol kezde zalda otyrǵandar dý qol shapalaqtap, dúrligip oryndarynan turyp ketedi. Úndiniń bir aqyny minbege shyǵyp, aqynnyń halyqtar dostyǵy týraly jyrlaǵan «Jańa zań» óleńin óz tilinde jatqa aıtyp beredi. Jurt qoshemet kórsetip, uzaq qol shapalaqtap turyp alady.
Sonda M. Áýezov:
– Mine, men sol Jambyldyń ultynanmyn, – deıdi. Sondyqtan, balalar, óz ultymyzdy súıip, ózge ultty qurmetteý kerek. «HH ǵasyrdyń Gomeri» atanǵan Jambyl Jabaevtyń dańqy álemge jaıylyp, qazaq halqy barda onyń esimi de birge máńgilik jasaı beretinine kámil senemin.
Úıge: Óleńderin jattaý.