InfoHub Logo

Sýda júze bilý - ómirge óte qajet. Adam balasy erte zamannan beri sýda júzýmen aınalysyp keledi. Jazǵy qapyryq, ystyq kúnderde adamdar júzdep, myńdap jaǵajaılarǵa - ózen-kólderdiń, teńizderdiń jaǵalaryna jınalady. Sýdyń jaǵasyndaǵy taza, salqyn aýa, kúnniń sáýlesi, tabıǵı kógildir ósimdikter dúnıesi demalysqa óte paıdaly. Árıne munyń bári, ásirese jaqsy júze biletin adamdardy erekshe raqattandyrady.

Júzý degenimiz sýdyń betimen nemese ishimen belgili tereńdikte qolmen jáne aıaqpen esý qımyldary arqyly adamnyń ilgeri jyljýy. Júze biletin adam sýdaǵy neshe túrli kedergilerdi jeńedi, bireý-mireý sýǵa batyp bara jatsa, ony qutqarýdy da biledi.

Júzýmen shuǵyldanýdyń sporttyq jetistikterge jetýde mańyzy zor. Mysaly: sýǵa sekirý, sý shańǵy sporty, esý jelken sporty jáne t.b. mundaı sport túrlerimen aınalysý úshin aldymen júzip úırený qajet. Sýda júzýdiń mynadaı sporttyq ádis tásilderi bar. Krol – erkin júzý (etpettep jáne shalqalap), bras jáne baterfláı (baterfláı keıde delfın dep te atalady). Sporttyq júzýdiń osy túrlerimen shuǵyldanatyn adamdar júzý ádisterin tyńǵylyqty oryndaýǵa daǵdylanady.

Shomylý jáne júzý dene músheleriniń syrtqy temperatýra ózgeristerinen, salqynnan paıda bolatyn aýrýlarǵa shaldyqpaı, tózimdi bolýyn tárbıeleıdi. Ózen-kólderde júzý bolsa, kúnniń shýaǵy men taza aýa adam denesine kúshti áserin tıgizedi.

Sýdyń ishinde adam salmaqsyz bolatyndyqtan, denege kóp kúsh túspeıdi de omyrtqa jotasy sozylady, bulshyq et talshyqtary uzarady. Sonyń áserinen adam tulǵasy symbattanyp, qımyl-qozǵalysy erkin de ásem kórinedi.

Sýda júzýdiń paıdasy:

Sýda júzý kezinde sizdiń barlyq bulshyq etińiz jumys jasaıdy. Sýda birese aıaqpen, birese qolmen júze almaısyz. Bári bir ýaqytta sizdiń júzýińiz úshin qyzmet etýi tıis. Ár bulshyq et túrlishe kúsh alady. Sol sebepti, deneńizdiń bulshyq eti óz formasyna qaraı qalyptasyp, symbattylyǵyńyz arta túsedi.

Sýda júzý omyrtqa aýrýlarynyń aldyn alady. Qozǵalys dene músheleriniń qyzmetin arttyryp, omyrtqa súıekteriniń janyndaǵy kishkentaı bulshyq etterdi «tynyqtyrady». Omyrtqa baǵanasyna túsken aýyrlyqty tejeıdi. Sonymen qatar, osteohondroz aýrýynyń aldyn alyp, dene bitimińizdi qalypqa keltiredi.

Júrek qan tamyrlarynyń júıesi de sizge «alǵys» bildiredi. Sebebi, júzý júrek soǵysyna ıgi áser etip, qan aınalymyn júıege keltiredi.

Bul sport túrimen mashyqtanǵan adamnyń tynys alý múshesi de jaqsy qyzmet atqaratyn bolady. Ásirese, kókirek qýysy keńeıip, tynysy ashylady.  

Dene temperatýrasy qalypty jaǵdaıdan shyqpaı, ımýnıtetińiz sýyq tıýge, tumaýǵa qarsy tura alady.

Sonymen qatar, artyq salmaqtan arylýǵa kómektesetini de bar. Kóp qozǵalys pen energıanyń jumsalýynyń áserinen aǵzadaǵy kalorıa mólsheri azaıa túsedi. Oǵan qosa, júzý kezinde omyrtqaǵa travmotologıalyq qaýip tónbeıtinin eskerý kerek.

Jáne de júzý sporty júıkeni juqartyp, oıdy myń bólgen kúızelisten aryltýǵa sep bolady. Sýyq sý adam denesindegi jaǵymsyz emosıa men negatıvti kóńil-kúıdi shaıyp áketedi. Boıyńyzǵa qýat berip, sergitedi.

---