Kedeılik, sen jeksuryn, túsin, sýyq,
İzdemes seni adam kerek qylyp.
Amal joq, yqtıarsyz qul qylasyń
Maǵan salsa kasyma kelme jýyq.
Jandy jep sen ǵoı meni arytatyn,
Kúniń joq at pen asqa jarytatyn,
Jyrtyqtan jyltyldaǵan jas denemdi,
Kúnge qaqtap, aıazǵa qarytatyn.
Jarytpaı kıer kıim, isher asqa,
Sóktirip maly barlaý nadan, nasqa.
Jas kóńildi qaıǵymen ýlandyryp,
Sensiń ǵoı toltyratyn kózdi jasqa.
Qınaıtyn jan alǵyshtaı jandy sensiń,
Túsi sýyq jylanmen birdeı teńsiń.
Maǵan salsa kedeılik aty óshkirdi,
Der edim, turmastaı ǵyp jerge kómsin.
Biraq, sen ólmeısiń ǵoı, janyń berik,
Qutqarsań, bar álemdi shyny ólip.
Ólmeseń de óltirem óse kele,
Júrmespin joldas bolyp saǵan erip.
Talaıdy osy kúni-aq, júrmin kórip,
Jalqaýdy qaqpalaısyn attaı minip.
Talaptynyń mańyna jolamaısyń,
Talaptanyp qýýǵa ózimde erik.

---