Keldi hatyń, men sharshap
Otyrǵanda damyǵyp.
Habaryńa bek ańsap,
Súzilip kózim talyǵyp.

Sózińnen kórip ózińdi,
Qushaqtaı aldym qamyǵyp.
Kim súrtti sonda kózimdi,
Qamyqpaıyn ne ǵylyp.

Sóılesip gúldeı jaınady,
Býlyqqan kóńilim taryǵyp.
Qapaly lebiziń aıdady,
Gúl samalǵa malynyp.

Hatyń bolyp bir aına,
Qaraı qaldym ańyryp.
Baıaǵy Mahmut joq, qaıda?
Ózimdi qappyn jańylyp.

Sarǵaıǵan, túsi ózgergen,
Shań basyp, keýip qańyryp.
«Kimsiń?» — deıdi kez kelgen,
Dostyna jalǵyz tanylyp.

Aınadan kórip bul tústi,
Kete jazdym jarylyp:
Qýat bitti bir kúshti,
Jeńilerlik taǵdyr jalynyp.

Mysal etip bul jónge
Kórseteıin mynany:
Qýaty kúshti výlkandar
Sóngendeı biraz turady.

Ólýsirep, álsirep,
Tútini keıde shyǵady.
Býlyqqan saıyn qýatty
Boıyna jıyp nyǵady.

Ol qýatpen atyldy,
Kim qarsylyq qylady?
Betin japqan taý-tastar,
Byt-shyt bolyp synady.

---