Keler oqý jylynan 5-8 jáne 10 synyptardy támamdaǵan oqýshylar qazaq tilinen emtıhan tapsyrmaq
Kelesi oqý jylynan bastap 5-8 jáne 10 synyptardy aıaqtaǵan oqýshylar qazaq tilinen emtıhan tapsyrýy múmkin. Bul týraly «Ashyq» NQA portalynda jarıalanǵan Oqý-aǵartý mınıstriniń buıryǵynda jazylǵan.
«2023-2024 oqý jylynan bastap negizgi orta (5-8 synyptar), jalpy orta (10 synyp) deńgeıinde akademıalyq jyldy aıaqtaǵan kezde qazaq tilinde oqytatyn mektepterde «Qazaq tili» páni boıynsha jáne qazaq tilinen basqa tilde oqytatyn mektepterde «Qazaq tili men ádebıeti» páni boıynsha emtıhan engiziledi. Qazaq tili boıynsha emtıhan oqý baǵdarlamasyn meńgerý qorytyndysy boıynsha memlekettik jalpyǵa mindetti bilim berý standartyna sáıkes, jazbasha jáne aýyzsha nysanda ótkiziledi. Emtıhandy ótkizý ýaqyty bilim berý uıymynyń pedagogıkalyq keńesimen aıqyndalady. Tapsyrmalardy akademıalyq adaldyq qaǵıdattaryn saqtaı otyryp, pedagogter qurastyrady jáne bilim berý uıymynyń ákimshiligi bekitedi. «Qazaq tili», «Qazaq tili men ádebıeti» pánderi boıynsha qorytyndy baǵa emtıhan (5 baldyq shkala boıynsha) jáne jyldyq baǵalaý (5 baldyq shkala boıynsha) nátıjeleri negizinde 30-70% paıyzdyq araqatynasta qoıylady. Qorytyndy baǵalaý eń jaqyn bútinge qaraı dóńgelekteledi», - delingen qujatta.
Buıryqtyń túsindirmesinde jazylǵandaı, mundaı ózgeris qazaq tiliniń mártebesin kóterý maqsatynda enigizilgeli otyr.
«Memlekettik tildiń mártebesin arttyrý maqsatynda 5-8, 10 synyptarda qazaq tili boıynsha emtıhan engiziledi», - dep túsindirme berilgen buıryqqa.
Eskeretini - bul norma 2023 jyldyń 1 qyrkúıeginen bastap qoldanysqa engiziledi.
Buıryq 3 aqpanǵa deıin kópshilik talqylaýda bolady.
You Might Also Like
-
Sirá, bizdiń aramyzda kez-kelgen ótinishke op-ońaı joq dep aıta alatyn adam joq shyǵar. Kez-kelgen adamda jáı ǵana bas tarta almaıtyn sıtýasıalar bolady.
