InfoHub Logo

Bir baıdyń jalǵyz ósken erke totaı qyzy bolypty. Ómir taqyrshyldyǵyn kórmegen. Mol dúnıeniń keń ortasynda shalqyp ósken qyzdyń sulýlyǵyna kerbezdigi saı kelipti-mys. Sulý qyzǵa dúıim eldiń talaı baıynyń kerbezsigen uldary, el ishiniń sulýy atanǵan jigitteri sóz aıtqanymen qyz onyń birde-birine yqtıarlyq bermeıdi. Teńim emes degen jaýap qaıyrady. Sóıtip júrip qyzdyń jasy birtalaıǵa keledi. Ol sonda da eshkimdi unatpaıdy. Qyzdyń bul qylyǵyna «qyzym otyryp qala ma» dep sheshesi qaýiptenedi de, qyzdyń jeńgelerin jumsap syryn
suraıdy. Sonda qyz: «Men bir úıdiń jalǵyz qyzymyn, áke-sheshem baryn meniń aldyma tosty, totydaı tarap ósirdi. Sonyń arqasynda kerbez qyz atandym. Meniń osy kerbezdigimdi kim sybyzǵyda tartady, teńim sol, soǵan baramyn», — deıdi.

Qyzdyń sózi aýyzdan-aýyzǵa tarap elge jaıylady. Endi qyzǵa jorǵa mingen úkili jigitter emes, sybyzǵyshy jigitter kele bastaıdy. Qyz olardyń da eshbiriniń kúıin jaqtyrmaıdy. Sóıtip júrgende, bir kúni jalbyr shapandy sybyzǵyshy jigit kelip: «Seniń kerbezdigiń meniń myna kúıimnen artyq qandaı edi?!» — dep kúıin tartady. Kedeı jigittiń kúıine rıza bolǵan qyz soǵan qosylatynyn bildiredi. Áke-sheshesi otyz kún oıyn, qyryq kún toıyn jasap, qyzyn súıgen jigitine qosyp attandyrady. Sondaǵy jigittiń tartqan kúıi osy «Kerbez qyz» kúıi eken deıdi.

 

---