Sálem bere bara qalsam Murata,-
Tynyshtyq dep aldymen suratpa.
- Tynyshtyq pa, tynyshtyq pa, balalar?
Dep otyrar qysy-jazy ıyqta.
Qys ta tanys qorjynyna muz artqan,
Bári tanys jylymyq tún, uzaq tań.
Ómir tanys ómir jasyn uzartqan,
Ázirge aman ólim deıtin tuzaqtan.
Shatynaǵan soǵys salǵan syzattan,
Kári keýde jalyn atqan, syz atqan!
Tórt balany tynyshtyqqa qurban qyp,
Tórt kelindi tórt adamǵa uzatqan.
Tórt kelinnen alyp qaldy tórt bala,
Ózi - pana, al ózińe - tórt pana.
Qartyń otyr túgendep ap upaıyn,
«Aıyrbastap tórt qaraǵa, tórt qara».
Qartyń qazir bir báıterek máýeli,
Seksen emes, júzińnen de dámeli.
Sálemińe qaıtaratyn jaýaby:
- Tynyshtyq pa? - dep suraıdy áýeli.
Sýyt júrgen káriden de, jastan da,
- Tynyshtyq pa? - dep suraıdy sasqanda.
Kún kúrkirep, shatyrlasa naızaǵaı,
- Tynyshtyq pa? - dep qaraıdy aspanǵa.
Ómirde áli qaýip kóp qoı ne túrli,
Qart qalǵymaı kúzetshi bop bekindi.
Sál uıyqtasa tórt nemere tórt jańqa,
Kózden ǵaıyp bolatuǵyn sekildi.

---