InfoHub Logo

Shyńǵys hannyń Joshy degen balasy jabaıy qulan aýlap, ózin qaýmalaǵan nóker serikterinen tym uzap ketkenin sezbeı de qalady. Hanzada júıtkigen qulandardy ótkir jebemen dál kózdep qulata beredi, onyń júreginde beıshara janýarlarǵa degen aıaýshylyq bolmaıdy. Jabaıy qulandar úıiriniń «Aqsaq qulan» atymen máshhúr, tipti qasqyrdan da taısalmaıtyn (onyń bir aıaǵy naq osy sur jyrtqyshtarmen shaıqasta zaqymdanǵan eken) ójet ári kúshti aıǵyry kenet jalt burylyp, ańshyǵa qarsy umtylady. Aqsaq qulan shabýylynyń joıqyn da tegeýrindi bolǵany sondaı, Joshy atynan ushyp túsip, sol boıda moıyny úzilip, jan tásilim etedi... Qýǵynnan qutylǵan qulan úıiri qyr asyp, erkin quıǵyta jóneledi.

Nóker serikteriniń Uly hanǵa Joshynyń ólimin estirtýge júrekteri daýalamaıdy. Kóne ǵuryp boıynsha jaman habar ákelgen adamdy ólimge buıyratyn. Sol kezde dalanyń Uly jyrshysy, abyz qart Ketbuǵa qaıyńnan dombyra shaýyp, ishek taǵyp, Uly hannyń saraıyna kele, altyn taqtyń aldyna tizerleı qulaıdy. Ózine abyz qarttyń jaqsylyqpen kelmegenin sezgen ámirshi túnergen júzben: «Ýa, Uly jyraý, ne datyń bar?» dep suraıdy. Biraq Ketbuǵa lám-mım dep til qatpastan, dombyrasymen bir qaıǵyly áýendi tarta jóneledi. Bul kúıdiń sıqyrly dybystarynan Uly hannyń kóz aldyna jas hanzada Joshynyń ańǵa shyqqany, oǵan kóktemgi kók maısada jaıylyp júrgen qulan úıiriniń kezdeskeni hám hanzadanyń ań aýlap elikkeni elestep, tizilip ótkendeı bolady...

Qart jyrshy zarly kúıin aıaqtaıdy. Biraq Uly han da, basqalar da kúı tilinen bolǵan oqıǵanyń bárin túsinedi: dombyra shapqan attardyń dúbirin de, áljýaz jas qulyndardy aıaǵan qulandardyń beımaza úreıin de, óz úıirin qorǵaǵan aqsaq qulannyń aqyly men qaıratyn da jetkizip aıtty. Ásirese, aqsaq qulannyń hanzadaǵa qarsy shapqan tusyn zarlata qaıyrdy...

Han ún-túnsiz uzaq otyrdy. Aqyry, Uly han til qatty: «Sen maǵan ulymnyń qazasy jaıynda qaraly habar ákeldiń. Dombyrańnyń kúıin tyńdap, bárin uqtym. Mundaı habar úshin ólim jazasyna laıyqtysyń. Biraq óziń bir aýyz til qatpaǵandyqtan, jazany dombyrań tartsyn. Onyń saǵaǵyna qorǵasyn quıyńdar!»

Osylaısha Uly jyraý — dana Ketbuǵanyń arqasynda mońǵoldardyń qaharly ámirshisine jas hanzadanyń ólimi estirtilipti. Biraq sumdyq ǵurypqa qaramastan, eshbir adam zardap shekpepti. Tek qaraly habardy jetkizgen dombyranyń kómeıine balqyǵan ystyq qorǵasyn quıylady. Sol kezden beri dombyranyń shanaǵynda tilik tesik paıda bolypty.

«Aqsaq qulan — Joshy han» kúıi osylaı týypty-mys.

---