InfoHub Logo

Saýyr men Saıhan taýlaryn qaq jaryp aǵyp jatqan ózenniń boıynda quz jartas bar. Munda alyp qus uıasynyń orny jatyr. Ábden sarǵaıyp, kónerip ketken úlken aǵash butaqtarynan jáne shóp qaldyqtarynan jıylǵan uıany halyq «Qumaı uıasy» dep ataıdy. «Uıa osyndaı úlken bolǵanda, qumaıdyń ózi qandaı boldy eken?!» dep jurt tań qalady eken. El arasynda osy uıa týraly mynadaı ańyz bar kórinedi.

Erte zamanda Malaı degen qoıshy bolypty. Bir kúni ony qumaı degen alyp qus kóterip, qalyń kuz jartastyń ishindegi balapanyna ákelip tastapty. Endi Malaı balapanmen birge qus ákelip bergen ań, mal etin jep, kún kóredi. Shyńyraýdan qalaı shyǵýdyń amalyn oılastyra bastaıdy. Ań men maldyń taramysyn esip arqan jasaıdy.

Kúz kelip, balapan ósip, er jetedi. Bir kúni Malaı qustyń eki aıaǵyna arqandy baılaıdy. Ózi sol arqanǵa asylyp jatady. Birazdan soń enesi kelip, balapanyn ertip joǵary kóteriledi. Arqanǵa belinen asylyp jatqan Malaı da birǵe ushady. Eki qumaı qatar ushyp, Saıhan taýynyń basyna qonady. Malaı bolsa qustyń aıaǵyndaǵy arqandy sheship qala beredi. Qumaılar ushyp ketedi.

Osylaı bir jaz joǵalyp ketken Malaı eline oralady. Ony kórgen jurt tapqyrlyǵyna rıza bolady. «Malaı, tasqa túsýiń qalaı?» degen mátel osydan qalǵan eken.

---