InfoHub Logo

Qazı aǵaı úrkekkógin arbaǵa jegip, keshqurym jaıylymǵa tartty. Kishkene balasy Serikti birge ala ketti.

Balanyń qýanyshy qoınyna syımady. Aınalaǵa qyzyǵa qaraıdy. Alda kók orman. Jol boıy túgel jaıqalǵan bıdaı. Aýa qandaı taza.

— Áke deımin, dala qandaı ádemi! — dep Serik ákesiniń jeńinen tartqylady.

— Iá, balam, týǵan dalań qashan da ystyq, qashan da ádemi! — deıdi Qazı alysqa kóz jiberip.

Mine, ózek baýyrynan mal kórinedi. Ákeli-balaly ekeýi vagon qosqa kelip at basyn tiredi.

Torlaǵan jaýyn bultynan aınala á degenshe qarańǵy tartty. Najaǵaı oty jarqyldap qoıady. Ekeýi qosqa kirgende vagonnyń ishi qarakóleńke edi. Qazı aǵaı sham jaqty. Peshke ot tutatyp, shaı qaınatty. Serikke qostyń shaıy úıdegiden de dámdi bolyp kórindi. Ákesi shekpenin kıip, belin býdy da, typyrshyp turǵan atyna qarǵyp mindi.

— Serikjan, meniń tonyma oranyp uıyqtaı ber. Oıanǵanda anaý buzaýdy baıqaı salarsyń, — dedi de jortyp ketti.

Qos ysyp ketken soń Serik esikti sál ashyp qoıdy. Syrtta orman qaraýytady. Bult búrkep, juldyzdardy kórsetpeıdi. Áldeqaıdan sıyr móńireıdi.

— Baılaýly jatyp azyp ketedi-aý, semirmeıdi ǵoı! — dep aıady bala. Dorbadan bir kesek nan alyp, aýzyna tosty, jemedi. Tonǵa oranyp qaıta jatty. Bir sátte basyn kóterip tysqa qarasa, qyzyl buzaý basjibin súıretip, qosty aınala shapqylap júr eken, sheshilip ketipti. Baılamaq bolǵan Serikten úrkip, aǵash arasyna qasha jóneldi. Bala jiptiń ushynan tartyp, kóp jerge deıin tyrmysyp edi, qarańǵyda súrinip qulap qaldy. Buzaý uzap barady.

— Qalyńǵa kirip ketse taba almaımyn-aý, qasqyr jep qoısa qaıtem, — dep yza bolǵan Serik jylap jiberdi. Jas tolǵan kózin aıyrmaı júgirip keledi. «Buzaý munda» degendeı, najaǵaı jarq ete qalady da, artynan tas qarańǵylyq ornaıdy.

— Áýkim, áýkim, aýǵa-aý! — dep ol úni bitkenshe aıǵaılaıdy.

Buzaý aǵashty jıektep qashty. Aqyry shoq taldyń irgesine kelip, qulaǵyn qalqaıta qoıdy. Áldeneden úrikken sıaqty. Búıiri solq-solq etedi. Serik «áýkim-áýkim» dep jaqyndaı berdi. Súıretken uzyn jipke qoly jetkende, buzaý taǵy yrshyp tústi.

— Endi senen ólsem de aıyrylmaspyn! — dep, bala jipti beline orap aldy. Buzaý keıin tartady. Serik ilgeri súıreıdi. Alysta qostyń álsiz jaryǵy kórinedi. Qap-qara bult tónip keledi. Najaǵaıdyń jarqyly jıilep, aspan dúńgir-dúńgir etti. Muzdaı sýyq jańbyr nóserlep quıyp ketti. Bárinen qorqynyshtysy najaǵaı boldy. Aspan satyrlap synyp, kúlparsha bolyp túsip jatqandaı. «Buzaýdy  tastap, qosqa júgirip ketsem qaıtedi?» degen bir oı kelip edi. «Jo-joq, malshy olaı etpeıdi»  — dedi.

Bir kezde alysyp júrip buzaýdy qosqa jetkizdi-aý…

---