InfoHub Logo

— Balalar, sender balyqshynyń jolynda ótirik óle qalyp, san soqtyrǵan túlki jaıly ertegini oqydyńdar ma? — dedi Jylqybaı naǵashym.

— Oqydyq.

— Soǵan nanasyńdar ma?

— Nanamyz, — desti kishkentaı Qýanysh pen Zeıin.

— Al sender she? — dep, eresekteý Maral men Sofıaǵa qarap edi:

— Ertegi ǵoı, — dep kúldi de qoıdy. Naǵashym jyltyr basyn sıpap qoıyp, kúlimsirep otyrdy da, tańdaıyn tyq etkizdi.

— Tipti tańǵajaıyp jumys boldy. Shańǵymen bir túlkiniń izine túsip kele jattym. Kún tymyq, úp etken jel joq. Toǵaı appaq qyraý jamylyp tur. Kún kózi erkin kóterilip kete almaı, taldardyń tóbesinde ǵana jyljyp barady. Ertemen kóp jerdi kezip shyqqam. Túlki izi birde qarǵa jasyrynyp, birde adam baspas shytyrmanǵa kirip shımaı salyp, áýrelep baqqan edi. Damyldap alaıyn dep alańqaıǵa bógeldim. Bir kezde saýysqandar shyqylyqtap qoıa berdi. Ábigerlenip júr. Taldardyń qyraýly basyn jaıqap-jaıqap ótedi. Myltyǵymdy qysa ustap, syǵalap qaraımyn. Eshteńe kórinbeıdi. Saýysqandar qasqyr ne túlki kórse osylaı etetin. Bir kezde tal arasynan qyltıyp qap-qara eki qulaq kórindi. Tanı kettim, qýdyń ózi eken. Ol bir jatty, bir turdy. Meni mazaqtap, áýreleı bastady. Otyrdym da qoıdym, qozǵalǵam joq. Álden soń eki-úsh attap beri shyqty da, qar betine baýyryn tósep jata ketti. Quıryǵynyń ushyn tistelep qoıady. Jalyndaı qyp-qyzyl bolyp aýnap-aýnap túsedi. Myltyǵymdy ilgeri sozdym. Toǵaı selk ete qaldy. Túlki sulq jatyr eken. Qar betinde qan tamshylary bar. Aýdarystyryp qaradym, tý syrty qyp-qyzyl, tamaǵy men baýyry qardaı appaq, tumsyǵy men aıaqtary qap-qara. Nesin aıtasyń, keremet ádemi eken. Qorjynǵa salyp,  arqama baılap aldym. Aýylǵa kelgenimde, áli jaryq bolatyn. Bar bala júgirip aldymnan shyqty.

— Aǵa, tiri kekilik ákeldińiz be?

— Aǵa, qara qurdyń ádemi qorazyn ákelem dep edińiz ǵoı, — dep jan-jaǵymnan shýlap qoıa berdi.

Men qorjynymdy alyp, qar betine tastadym. Balalar tań-tamasha. Talpaq tanaý aqquba  bala Zeınur qolyn apara berip edi, túlki balanyń basynan sekirip ketip, ormanǵa qaraı quıyndaı ushty. Kúńgirt tartqan dalada burqyratyp bara jatqanyn ǵana kórip qaldyq. Zeınur baqyryp jylap tur.

Tań-tamashamyn. Jolda kele jatyp ta qybyr etken joq. Qorjynnan alyp jerge qoıǵanda da qozǵalmady.

— Bul erteginiń ózindeı tańǵajaıyp oqıǵa boldy, — dep balalar shýlap qoıa berdi.

---