InfoHub Logo

Meniń bala kóńilimdegi oılar tizbegi aldymen «Meniń atym Qojadaǵydaı» kóz aldymnan ótetindeı. Sebebi, bala kezimizden Qoja týraly kıno kórip óstik. Keıinnen kitabyn qyzyǵyp oqydyq. Aýylda Qoja men Janarǵa, Jantasqa  uqsaıtyn balalarmen dos boldyq. Kitabyndaǵy ár keıipker janymyzǵa jaqyn boldy. Mektep dırektory men Maıqanova apaı she? Shyr-shyr etip, balalarǵa bilim beredi, jaqsy, tárbıeli bolýǵa shaqyrady. Mine, osy kitap arqyly biz ózimizdiń jaqsy-jaman jaqtarymyzdy bilip, oı qorytamyz.

Iá, kitap – meniń aqylshy dosym.  Kitap – ári, bar bilim-ǵylymnyń qaınar kózi. Qazirgi kezde jańa tehnologıalardyń damýyna qaramastan, kitaptyń alatyn orny men úshin ózgermeıdi. Ol adamdy tereń oılaýǵa jeteleıdi. Kitaptyń betin ashqan saıyn onyń áleminiń tylsym tabıǵatyn, jańa qundylyqtaryn úırenesiń.

«Nadanmen dos bolǵansha, kitappen dos bol» dep tekke aıtylmaǵan shyǵar. Kitap oqyǵan adamnyń shette qalmasy anyq. Ómirge kelgen jas bala, negizinen tárbıeni úsh ortadan kórip, bilip alady. Ol – otbasy, júrgen ortasy jáne bilimi. Men ózim osy úsh ortadan tálim alyp, aqyl túıemin. Eger bala únemi kitap oqysa neniń durys, neniń burys ekenin uǵady, neden úırenip, neden jırený qajettigin túsinedi dep oılaımyn.

Halqymyzda «Kitap – rýhanı azyq», - degen sóz bar.  Kitap bizdiń balań sanamyzǵa zor bilim quıa otyryp, bizdiń aqyl-oıymyzdy tárbıeleıdi. Men úshin, kitap - adamgershiliktiń qaınar kózi. Sebebi, jaqsy-jaman, aq-qara, qýanysh-muń degen dúnıelerdi tereń sezine otyryp, kitaptaǵy keıipkerlerden kóp nárse úırenemin. Olarmen birge qýanamyn, jylaımyn, olardyń jaqsy is-áreketine súısinip otyramyn.

Anam da únemi maǵan «Kitap – seniń dosyń, ómirlik úlken tárbıeshiń, úıretýshi ustazyń» dep aıtyp otyrady. Sondyqtan bizdiń kitaptan úırenerimiz óte kóp, kitapty oqý arqyly álemniń  ár túkpirine saıahat jasap, ómirdi tanyp, qanshama keıipkerler arqyly adamnyń boıyndaǵy jaqsy-jaman qasıetterdi ajyrata alasyń.

Bizdiń úıimizde úlken kitaphana bar. Onda qasıetti «Quran» kitabynan bastap, qazaqtyń bas aqyny Abaıdyń kitaby, qarasózderi bar. Odan bólek ózim týǵan meken týraly «Jetisý», «Jeruıyq meken – Jetisý» ensıklopedıasy, tarıhı «Kóshpendiler» trılogıasy, balalarǵa arnalǵan túrli ártegiler, tanymdyq ensıklopedıalar, uly aqyndar Sáken Seıfýllın, İlıas Jansúgirov, Maǵjan Jumabaev, Muqaǵalı Maqataevtardyń poezıalyq shyǵarmalary bar. Men byltyr jazýshy Oralhan Bókeıdiń áńgimeleri men Muqaǵalıdiń óleńderin oqyp shyqtym. Kóp nárseni oıyma túıdim. «Jetim botadaǵy» botaǵa júregim aýyrdy.  

Kitap – meniń altyn qazynam. Kitaptyń ózi eskirgenmen, sózi eskirmeıdi. Sondyqtan kitapty qasterleý kerek dep bilemin. 

---