InfoHub Logo

Kitaphana - ǵasyrdan-ǵasyrǵa adamzat tarıhynyń kerýenin súrindirmeı ákele jatqan, shyraǵy bıik parasattylyq pen bilimdiliktiń, baılyq pen biliktiliktiń kıeli ordasy. Al, osyndaı kıeli ordanyń basshysy - kitaphanashy!

Kitaphana jumysy kózge kórine bermeıtin aǵysy baıaý tereń ózen sekildi, túsingen adamǵa jaýapty jumys. «Kitap – máńgilik parasattyń eń kıeli ǵımaraty», - dep Á. Kekilbaev aıtqandaı, sol kitap ıeleri qataryna kitaphanashylar da  jatady.  Sol qyzyqty da jaýapty jumysty atqaratyn kitaphanashylardyń alǵa qoıǵan maqsaty – erteńi  bar eldiń jastaryn órkenıet álemine  bastap jol kórsetý,mádenıet kóshinen qaldyrmaı, artymyzǵa tárbıeli, bilimdi urpaq qaldyrý isine  yqpal etý. Kitaphana ómiri – syrt kózge biline, baıqala bermeıtin aǵysy baıaý, týlaǵan tolqyndar ishinde jatatyn ómir. Sol ómirge boılap,dendep engen adam ǵana bul shańyraqtyń qasıettiligin, kitaphanashy mamandyǵynyń qyry men syryn ańǵara almaq.

Alaıda, qazir kitaphana salasynyń qundylyǵy qandaı?

«Kitaphanashy-uly qurmetke ıe mamandyq. Sebebi, urpaqtardy tárbıeleıtin ustaz da, bolashaqtyń basshysy da, danasy da, ǵalymy da, eńbekqor eginshisi de, kenshisi de kitaphanashy aldyna keledi. Ómirge urpaq bergen analardy qalaı ardaqtasaq, sol urpaqty bilimdi bolýǵa, ultshyldyqqa tárbıelep júrgen kitaphanashylardy da solaı ardaqtaýǵa mindettimiz! Sondyqtan da, keleshek el tutqasyn ustar jas órender, kitaphana isi salasy bolashaqqa baǵdar berip, ultty uıystyryp, uly maqsattarǵa jeteleıtin ıdeıa, ıaǵnı «Máńgilik el» ıdeıasyn júzege asyratyn birden-bir sala bolǵandyqtan bul mamandyqtyń  abyroıyn kóteretin ister jasalynýy tıis dep oılaımyn. Qazirgi tańda elimizde kitaphana isi mamandaryn ál-Farabı atyndaǵy QazUÝ, Qazaq Ulttyq Qyzdar pedagogıkalyq ýnıversıteti, M.Áýezov atyndaǵy Ońtústik Qazaqstan memlekettik ýnıversıteti sekildi irgeli oqý oryndary daıarlap kele jatyr. Atalmysh oqý oryndaryn bitirgen jas mamandar óz bitirgen salalary boıynsha maman bolyp qalyptasyp, janashyrlyqpen eńbek etýi kerek. Sol kezde ǵana mamandyq óz qundylyǵyn kóteredi.

«Kitaphanashy» degen – kitap oqyp, kitap berip, úıine qaıtady deıtin tar uǵym ornyna, jas býynǵa rýhanı tanym beretin tulǵa retinde tanýda. Zaman kóshi ilgeri jyljyp, HHI ǵasyr aqparattandyrý kezeńinde oqýlyqtar, aýdıo-beıne jazbalar basqa da basylymdar elektrondy formatta júrgizilý ústinde. Jahandaný zamanynda kitaphana jumysynda jańa tehnologıalardy qoldaný – kitaphana salasyn damytyp, oqyrman qataryn tolyqtyrýǵa septigin tıgizeri málim. Sondyqtan da, zaman talabyna saı kitaphana qyzmetkerleri de jańa belesterden kórinýge tıis. Bolashaqta elimizdiń kez-kelgen óńirinde, shet aımaqtarda jańa tehnologıamen jabdyqtalǵan zamanaýı kitaphanalar boı kóterer bolsa, básekege qabiletti azamattar men azamatshalardyń qatary kóbeıeri haq.

Búgingi tańda kitaphana – paıdalanýshylarǵa aqparattyq qyzmet kórsetýdiń negizgi jáne qoǵamdyq-mádenı ortalyǵy. Al kitaphanashy kitap qaraýyly emes, sol kitaptardy jáne elimizde bolyp jatqan jaǵdaılardy nasıhattaýshy, jańashyl kózqarastaǵy tulǵa, rýhanı murany urpaqtan-urpaqqa dáripteýshi.

Bolashaqta elimizdegi kitaphana salasyn damýyna óz úlesin qosar jáne osy mamandyqtyń qyr syryn dáripteıtin jastar qatary tolyqsa, Qazaqstannyń básekege qabiletti elder qataryna qosylýǵa úlken úlesterin qosqany dep bilemiz!

Al órkenıetke jeteleıtin jalǵyz – kitap pen kitaphana ekenin umytpaıyq!

Gúlmıra SÁBDENOVA, ál-Farabı atyndaǵy QazUÝ-dyń dosenti,  tarıh ǵylymynyń kandıdaty.

Jansaıa Qosmyrza ál-Farabı atyndaǵy QazUÝ,  tarıh, arheologıa jáne etnologıa fakúlteti,  «Kitaphanalyq aqparattyq júıe» mamandyǵynyń 2 kýrs magıstranty

---