InfoHub Logo

Búgin Erke qyz ben mysyq Ǵajaıyp ormanǵa serýendeýge bardy. Bul ormandaǵy ań da, qus ta, tipti ósimdikter de sóıleı alady. Jaıqalǵan aqqaıyńdary, samyrsyn, shyrshalary bar, kók maısanyń ústinde qyzyldy jasyl gúlder jaıqalǵan Ǵajaıyp orman bul.
Erke qyz mysyǵy ekeýi búldirgen terip, sonyń qyzyǵymen ormanǵa tereńdeı enip ketti. Kenet aldarynan buryn-sońdy kórmegen ádemi kókoraı shalǵyndy jer shyǵa keldi. Munda gúlderdiń túr-túri bar eken. Bári shetinen ádemi. Samal jelmen terbelip, juparlaryn shashyp tur. Erke qyz qýanyp ketti. Ár gúldi ıiskep, shyr aınalyp bıledi. Gúlder de Erke qyzdy unatyp qalǵan sıaqty, bári án shyrqaı jóneldi:
Appaq, sary, qyzyl gúl
Jaıqalamyz terbelip.
Aıalaıdy tabıǵat,
Erkeleter jel kelip.

Gúldi jaqsy kóretin,
Keldi bizge erke qyz
Gúl sıaqty Erke qyz,
Erke qyzdaı erkemiz.

Keremet! Qazaq jeriniń taý-tasy da, tipti názik gúlderi de aqyn eken ǵoı!
Erke qyz ben Mysyq gúlderdiń ózderin osylaı jyly qabyldaǵandaryna dán rıza boldy. Kenet qaıdan shyǵa kelgeni belgisiz gúldi alqap ádemi ala qanat kóbelekterge tolyp ketti. Árqaısy bir-bir gúlge qonyp edi gúldi alqap tipti qulpyryp ketti.  
-    Aıtpaqshy, búgin Kóbelekterdiń merekesi ǵoı, - dedi Mysyq.
-    Ras pa? Qandaı tamasha! Dál mereke kúni kelgenimiz qandaı jaqsy boldy! – dep qýanyp ketti Erke qyz.
-    Iá. Qazir olar bı bılep, aralaryndaǵy eń ádemi qanaty bar kóbelekti tańdaıdy. Ol kóbelekterdiń Patshaıymy bolyp saılanady. Naǵyz qyzyq qazir bastalady, - dep mańǵazdana mıaýlap qoıdy Mysyq.
Erke qyz ben mysyq kóbelekterdiń bıin tamashalaý úshin kók shalǵynnyń ústine jaılanyp otyrǵany sol edi, bireýdiń jylaǵan daýsy estildi. Ekeýi ańtarylyp, bir-birine qarady. Jylap otyrǵan kim boldy eken? Bizdiń mysyq qaǵilez ǵoı, ótkir kózderimen shette ósip turǵan gúl japyraǵynyń astyndaǵy jylap otyrǵan kóbelekti birden taýyp aldy.
-    Nege jylap otyrsyń, súıkimdi kóbelek? – dep surady báıek bolyp Erke qyz.
-    Meniń de bı jarysyna qatysyp, patshaıym bolǵym keledi,  - dep odan ári óksı jóneldi kóbelek. Qatty jylaǵany sonsha, qanattary dir-dir etedi.
-    Onda nege munda jylap otyrsyń? Jarys qazir bastalady. Tezdetip bara ǵoı, - dep Erke qyz ony qolyna alyp, ushyryp jibermek boldy. Biraq qolyna qonǵan kóbelektiń qanattarynyń jyrtylyp qalǵanyn baıqady.
-    Meniń qanattarym jyrtylyp qaldy, usha almaımyn, - dep jylaýyn údete tústi kóbelek. Qap! Endi ne isteýge bolady? Erke qyzdyń da,
-     mysyqtyń da kóbelekke jandary ashyp ketti. Oǵan qalaı da kómektesý kerek! Bizdiń mysyq aqyldy ǵoı. Bul joly da qarap qalmady.
-    Erke qyz, kóbelekke gúlerdiń kúltelerinen qanat tigip bereıik! – dep qýana mıaýlap jiberdi.
-    Alaqaı! Tabylǵan aqyl! Qandaı aqyldy ediń, Appaǵym! – dep Erke qyz mysyǵyn erkeletip qoıdy. Ekeýi birden iske kirisip ketti. Shalǵyndaǵy eń ádemi gúlderdiń kúltelerin jınap ákeldi. Gúlder de kúltelerin Erke qyzǵa qýana-qýana syılady. Jınalǵan kúltelerdi bir-birimen jalǵap, Erke qyz kóbelekke ádemi, úlken qanat tigip berdi.
-    Al, daıyn boldy! Qane, qanatyńdy jaıshy.
Kóbelek jańa qanatyn jaıyp jiberip edi, mysyq talyp qaldy. Qorqynyshtan emes árıne, tańqalǵannan. Bir gúl juparyn shashyp jiberip edi, qaıtadan esin jıyp aldy. Mundaı ádemi qanatty buryn-sońdy esh kóbelek kórmegen shyǵar. Bári jańa qanat kóbelektiń janyna jınalyp, onyń qanatyn tamashalap ketti. Kóbelek te qatty qýanyp, Erke qyz ben mysyqqa alǵysyn aıtty. Sonymen, bı saıysy da bastaldy. Árıne, gúldi shalǵynda qońyraýgúldiń syńǵyrymen bı bılegen kóbelekterdiń arasynda kúlteli qanaty bar kóbelek erekshe kórinip, kóbelekter Patshaıymy atandy.

Osylaısha bizdiń keıipkerlerimiz búgingi kúnderin óte kóńildi ótkizdi. Balaqaı, sen de qolyńnan kelgenshe qınalyp júrgen dostaryńa kómektes. Sonda sen de, dosyń da qatty qýanasyńdar.

---