InfoHub Logo

Jazdyń tamyljyǵan ystyq kúnderiniń biri. Ańyzaqtan shólirkegen Qurmanǵazy bir aýylǵa kezdesip, aýyl ortasynan shetkeri, kógalǵa tigilgen aqboz úıge qaraı atynyń tizginin burady. Úı syrtyna jaqyn kelip, ishke dybys beredi. Úıden osy aýyldyń túıeshisi Jıenáli shyǵyp, Qurmanǵazyǵa amandasady. Qurmanǵazy onyń sózinen bul Ádileke tóreniń otaýy ekenin biledi de:

— Shóldep kele jatyrmyn, sýsyndap shyǵýǵa ruqsat bolar ma eken? — deıdi. Sonda Jıenáli:

— Jaraıdy, hanymǵa baryp aıtaıyn, — dep úıge qaıta kirgende, tórde otyrǵan hanym:

— Úıdiń qojasy joq, túsýge bolmaıdy! — deıdi daýystap.

Syrtta turǵan Qurmanǵazy bul sózdi estigennen keıin aýyldyń batys jaǵyna jaǵalaı qonǵan kedeıdiń qarasha úılerine qaraı júre beredi. Bir úıdiń janyna kelip, «osy aýyl úıiniń tórin bermese de, kóleńkesin beretin shyǵar» dep atynan túsip, kıiz úıdiń kóleńkesine otyrady. Úı ıesi jarly bolsa da, óziniń shamasyna qaraı kúıshini kútip alady.

Qurmanǵazy biraz tynystap, endi ketpekshi bolyp syrtqa shyqqanda bıe saýynynan qaıtqan baıdyń qyz-kelinderin kóredi. Qoldarynda bir-bir shelek toly sút, kóbigi burqyrap, teńselgen júristen jerge tógilip keledi. Muny kózi shalǵan Qurmanǵazy dombyrasyn alyp, bir kúıdi tógilte tartyp jiberedi. Dombyranyń bulbuldaı saıraǵan ásem sazyn úı ıesi de, shýyldasyp kele jatqan qyz-kelinshekter de uıyp tyńdaı qalady. Qurmanǵazy kúıin bitirgende qasynda turǵan úı ıesi:

— Qonaǵym, bul tartqanyńyz qandaı kúı? — dep suraıdy.

— Oı, aǵataı-aı! Bular baılyqqa belshesinen batyp, ıti maı jemeı otyrsa da, suraǵandarǵa sút túgil, bir jutym sý da bermeıdi. Olar sút pen qymyzdy siz ben biz sekildilerdiń ishkeninen kóri, jerge tógilgenin jaqsy kóredi. Anaý, sútti jerge tógip kele jatqan baıdyń aqylsyz qyz-kelinderin mazaqtap, qaıran qor bolǵan qymyzǵa shyǵarǵan «Kóbik shashqan» atty kúıim, — depti Qurmanǵazy.

---