InfoHub Logo

Qorqyt ólimge boıusynbaı, ajaldan qutylmaqshy bolyp, qashyp dúnıe júzin kezedi. Qaısy jerge barsa da, aldynan qazylyp jatqan kór shyǵa beredi. Aqyry ólimnen qutylmasyn bilgen Qorqyt ata Syrdarıanyń aǵyn sýynyń ústine kilem jaıyp jiberip, qaryndasyn qasyna alyp, sol kilemniń ústinde otyryp elmen, jerimen, qaryndasymen jáne óziniń ómirimen qoshtasqan zarly kúılerin tartady. Ózen boıynda otyrǵan elderdiń qobyzdyń zarly daýysyn estigenderi shydap tura almaı, ózenniń eki jaǵalaýyna topyla jınalyp, emirene tyńdasady.

Ózen jaǵalaýynan syrtqary tústik jerde otyrǵan kóshpeli elderdiń de keshqurym qobyz daýsyn estigen qyryq qyzdary jaqyn jerde shyǵar dep qyzyqqannan júgire-júgire jete almaı, otyz toǵyz qyzdyń ókpeleri óship, jolda óledi. Olardyń ishinen júgire almaı jaıymen júrgen bir aqsaq qyz ǵana Syrdyń jaǵasyna jetip, Qorqytty kórip óledi. Sol aqsaq qyzdyń molasy — Qorqyt atanyń qoıylǵan jeriniń týra sol tóstiginde arasy bir shaqyrymdaǵy jerdegi shyńnyń basyna ornatylǵan munara. Osy kezde de jurttyń bári ony «Aqsaq qyzdyń belgisi» dep ataıdy.

Qorqyt atanyń ústinde otyryp qobyz tartqan kilemin Syrdyń aǵysy ıinge soqtyryp toqtatqan jerinde qazýly kór aldynda daıyn eken. Ázireıil jan alǵysh ta jetip keledi. Sol sátte Qorqyt tylsymmen ózin kóbeıtip, qyryq Qorqyt etip kórsetedi. Olardyń qaısysy Qorqyt ekenin aıyra almaı sasqan «jan alǵyshqa» sol kezde Qudiret parman etedi: «Qyrqynyń qaısysy buryn kirpigin qaqsa, sonyń janyn al! — deıdi. Jany bar Qorqyt kirpigin qaqqan kezde jany alynypty. Sol jerdegi daıyn kórine Qorqyt ata qoıylady. Osylaı dep biletin jurttyń kópshiligi osy kezge sheıin Qorqyt atanyń sol ornyn qadirlep, qurmet tutady.

---