InfoHub Logo

Aıtýshylardyń ańyzyna qaraǵanda, Beısenbi Kók ıirim keńesine eki ret barǵan. Birinshi ret barǵanda naıman-kereı ortasyndaǵy jer talas bitimin naıman bılerimen kelisip, bitirip qaıtqan eken. Kelesi jyly jer talas qaıta órship, úlken tóbeles shyǵyp, eki jaqtan adamdar soıylǵa jyǵylyp, bas jarylyp, kóz shyǵyp, qol-aıaq mertigip, bul ister bitimsiz daýǵa aınala bastaǵan.

Ásirese kereı jaqtan bir jigittiń basy aıyrylyp, ólip qala jazdaǵan. Naımandar jaǵy kereıdiń jaraly adamyn qolyna salsaq, aýyr jaraqatyn kórgen yzaqor týystarynyń biri kózin joıyp, kisi qunyna qalarmyz. Onan da qolymyzda baǵyp, ólse de, tirilse de, kózben kórelik desken. Al kereı jaǵy adamymyzdy óltirip, tyǵyp tastadyńdar dep jarǵy jazyp, mal qýyp alǵan.

Bul ýshyqqan isti bitirýge naıman jaǵy sez ashýdy talap etken jáne kereı bıi Beısenbini shaqyrtqan. Bejeń ekinshi ret barǵanda, ol jerdegi kereı aýyldary qys qatty bolyp, maly jutaǵan. Ashtyq-jalańashtyq jaılaǵan. «Jut jeti aǵaıyndy» degendeıin sarysúzek aýrý júrip, adamdardan ólim-jitim kóbeıgen. Bejeń aýyldardy aralap kórip, baryn joǵyna telip, aqyl-keńes aıtyp janashyrlyq jasaǵan.

Ásirese ótken jyly jer bólisin muqıat istemeı, eki jaqqa da kóńilshektik istegenine qatty ókindi. Bul joly qatań kelip, jerdi ádil bóldi. Eki jaqty jaqsy kelisimge keltirdi. Kereıdiń soıylǵa jyǵylǵan jaraly adamyn týǵan-týystaryn ertip aparyp, kózimen kórsetti. Qarsy jaqpen aqylǵa kelip, dáriger shaqyrtyp, soıylǵa jyǵýshylardyń baǵyp-qaǵýyna ótkizdi.

Eki jaqtyń eregesin toqtatyp, eline qaıtty. Alaıda Bejeń óziniń dármensiz kúıde ekenin sezip, kóp oı tolqynyna túsken. Ózara bereke birlikte bolyp, irge bólmeı, altybaqan alaýyz bolmaı, oqý-bilimge umtylyp, óner úırensek, mundaı aýyr jaǵdaı týmas edi dep armandaǵan. Osy arman saparynda «Kók ıirim keńes» týǵan.

---