InfoHub Logo

2017 jyldan bastap, jumysker mamandyqtarynda oqıtyn tehnıkalyq jáne kásiptik bilim berý mekemeleriniń stýdentteri shákirtaqymen, jol aqymen jáne birrettik tegin tamaqpen qamtamasyz etiledi.

Bul týraly búgin OKQ-da ótken baspasóz máslıhatynda QR Bilim jáne ǵylym vıse-mınıstri Bıbigúl Asylova málim etti.

Qazirgi ýaqytta Bilim mınıstrligi tegin tehnıkalyq jáne kásiptik bilim berýdiń jańa tetikterin jasaqtaǵan. 2021 jylǵa deıin Qazaqstanda tegin bilim júıesimen 671,5 myń adamdy qamtý kózdelgen.

«Biz tegin tehnıkalyq jáne kásiptik bilim berý júıesiniń jańa tetikterin jasaqtadyq. Eger buryn mektep bitirgen túlek jumysshy biliktiligine nemese orta býyndy mamandyqtarǵa aqyly nemese memlekettik tapsyrys negizinde jeke-jeke túsken bolsa, jańa model boıynsha, túlek orta býyndy mamandyqqa jumysshy biliktiligi arqyly túsedi de, eńbek naryǵyna kiredi», - deıdi Asylova.

Onyń ústine, bilim berý, medısına jáne óner mamandyqtary boıynsha oqytý ishinara memlekettik tapsyryspen júrse, ekonomıka jáne zańger mamandyqtaryna oqytý aqyly bolady.

«2017 jyly atalmysh model boıynsha, eń kóbi 142 myń adam qabyldanatyny josparlanǵan. Olardyń ishinde, 40 myń adam jumysshy mamandyqtary boıynsha, 54 myń adam - 2 jumysshy biliktiligin alyp shyǵatyn orta býyndy mamandyqtar, 32 myńy - bilim berý, medısına jáne óner mamandyqtary, 16 myńy - ekonomıkalyq jáne zańgerlik mamandyqtar. Biz jumysshy mamandyqtaryna túsetin túlekterdiń sanyn eki esege arttyrýdy maqsat etip otyrmyz. Kelesi jyldan bastap, jumysker mamandyqtarynda oqıtyn tehnıkalyq jáne kásiptik bilim berý mekemeleriniń stýdentterin jergilikti búdjetter esebinen shákirtaqymen, jol aqymen jáne birrettik tegin tamaqpen qamtamasyz etý kózdelip otyr», - deıdi vıse-mınıstr.

Jańa baǵdarlama boıynsha, ásirese, bilim alýǵa qarajaty joq, az qamtylǵan otbasydan shyqqan jastardy kóptep tartý josparlanǵan.

Baǵdarlamany júzege asyrý kezinde elimizde jumyssyzdyq deńgeıin 4,8 paıyzǵa deıin tómendetý kózdeledi. 2021 jylǵa qaraı túlekterdiń 40 paıyzǵa jýyǵy jumysshy mamandyqtaryn ıgeredi degen boljam bar.

Aıta keteıik, 2017 jyldan bastap, kolejderde, tehnıkalyq jáne kásiptik bilim berý ordalarynda jumysshy mamandyqtaryna oqytý Qazaqstanda tegin júrgiziledi.

---