InfoHub Logo

Úkimeti, ákimi
tanymaǵan aýylym,
Júrekterin yzǵary
qarymaǵan aýylym.
Jańa ǵasyr esigin
attaǵaly tursa da,
"Svetine Ilıchtiń"
jarymaǵan aýylym.

Qazirgi Qojabaqy - múlde jańarǵan, jańǵyrǵan aýyl. Al bul bir kezdegi jas ustazdardyń aýdandyq "Kóńildi kúz" saıysynda belgili "Aýylym" ánimen parodıa retinde aıtqan áni edi.

Sol jolǵy emtıhan-synaqtaryn tapsyrý sesıasy ádettegiden tys kúz aıyna keldi. Óıtkeni bul jolǵy demalys emtıhan-synaqtardy tapsyrýǵa da ári memlekettik emtıhandy tapsyrýǵa da qosa berilgen bolatyn. Bul - óziniń ekinshi ret mamandyq alyp júrgen oqýynyń bitirýshi kýrsy.

Emtıhandaryn tapsyryp baryp, bir-aq kelýine bolatyn bolsa da, emtıhan-synaqtar men memlekettik emtıhannyń arasyndaǵy úzilis sátin paıdalanyp, mektepke kelip qaıtqysy kelgen edi. Osy kezde mekteptiń jas ustazdary aýdandyq "Kóńildi kúz" saıysyna iriktelip, ázirlikterin jasaı bastaǵan eken.

Mektepte oqýshylar arasynda ótetin kúz saıystaryna jurttyń kózi úırense de, jas ustazdardyń arasyndaǵy mundaı saıys dástúrge aınalmaǵan edi.

Saıysqa mekteptiń jas ustaz qyzdary iriktelipti. Qatynas qaǵazda basqa da sharttarymen birge toptyń aty, tósbelgisi, jańadan shyqqan ózderiniń áni, kórermenmen sálemdesýi jáne sońynda jurtshylyqpen qoshtasý sózderi, sonymen birge parodıa bolý kerek depti.

Ózinen osyǵan kómek surap turǵasyn, topty "Úrker" dep ataýdy usynǵan edi. Bul at saıyskerlerdiń ózine de unady. Biraq osy Úrker sózi kúzben baılanysýy kerek edi. Ol qazylardyń aldynda dáleldi bolýy kerek. Osy úshin derekter izdedi. Derek te tabyldy. Sonan soń tósbelgige salynatyn sýretterdi usyndy. Saıyskerlerdiń tarapynan tósbelgi de maquldandy.

Sodan keıin baryp qana "Úrkerdiń" sálemdesýi jáne tanystyrylýy jazyldy:

"Bizdiń tobymyzdyń aty "Úrker" dep atalady. Toptyń atyn bulaı qoıý sebebimiz - qyryq kún shildede kókjıekten kórinbeı, halyqtyń tilimen aıtqanda "jerge túsetin" Úrker shoqjuldyzy kúz aıy bastalysymen-aq aspan kóginde shyǵystan jarqyrap kórinetin bolǵandyqtan, biz de osy shoqjuldyzdyń atyn ózimizge enshileı otyryp, osy kúz saıysynda ónerimizben sol juldyz sekildi jarqyraı kórinsek eken degen nıetpen aldyq.

Bizdiń tósbelgimizdiń joǵary jaǵynda "Úrker" dep toptyń aty jazýly tur. Al tósbelginiń ishki sheńberiniń joǵary bóliginde alty juldyz beınelengen. Munyń sebebi - Úrker alabynda 500-den astam juldyz bolǵanymen, sonyń altaýy jaı kózge anyq kórinetindigine baılanysty. Shoqjuldyzdyń janynda Aı beınelengen. Munyń sebebi halqymyzdyń uǵymynda toǵysý kezeńinde Úrker men Aı bir-birine jaqyn kelse, jaqsylyq, qýanysh, malǵa jaıly kezeń bolady degen. Bul bizdiń ózimizdiń de búgingi saıystan jaqsylyq, qýanysh kútken nıetimizdi bildiredi. Shoqjuldyz ben Aıdyń tómengi jaǵynda Kókbóriniń sýreti salynǵan. Kókbóri túrki halyqtarynyń birligi men tutastyǵy retinde salyndy. Sebebi bıylǵy jylymyz - Halyq birligi men ulttyq tarıh jyly. Tósbelginiń tómengi sheńberinde osy jyl ataýy jazylyp qoıylǵan".

"Úrkerdiń" halyqpen sálemdesýi halyqtyń óz áni "Gúl-gúl jaına" ánimen ashylsa degen edi. "Tań baǵynda, aldaryńda -  "Úrker" toby, aǵaıyn!" Bul - sálemdesý ániniń qaıyrmasynyń sózi.

Qojabaqy kemerli
Aýyl edi ónerli.
Jınalyp otyr saıysqa
Qalyń qaýym el endi.
Tań baǵynda,
Aldaryńda -
"Úrker" toby, aǵaıyn!

Al sońynda "Úrker" halyqpen, sahnamen "Armandastar" ánimen qoshtasyp shyqsa degen bolatyn.

Úmit jibin jalǵaı túsip armandarǵa
Shaqyrady bıik beles aldan dara.
Óner bıik maqsattarǵa jalǵanǵanda
Tany elińdi, bil, jastar!

Q-sy:

Jas keýdede namys lebi oıanǵanda,
Saıys sharty máresine taıanǵanda
Jarqyrasyn juldyz!
Jazylmasyn jubymyz!
"Úrker" toby qoshtasady sizbenen.

Jańa án úshin "Kúz áýeni" mátini jazyldy. Ánin sazger shyǵardy:

Dýman toly asqarly
Kúz mezgili bastaldy.
Kúz áýeni kep jetti
Ánge bólep jastardy.

Q-sy:

Nurǵa bólep ómirdi,
Jyrǵa bólep kóńildi.
Jarqyraǵan sáýleli
Kúz áýeni tógildi.

Parodıa belgili ánge jazylsa degen edi. Belgili "Aýylym" áni bir kezgi aýyldy maqtan etse, endi parodıanyń sózinde naryqtyń áserinen elektr jelisinen ajyrap, maıshamǵa qarap qalǵan sol kezgi aýyldyń jaı-kúıi jazyldy:

Ne jańalyq kórse de
tańdanbaǵan aýylym,
Sharýashylyq órkendep,
jandanbaǵan aýylym.
Kompúterge jarmasar
oıly jasy búginde
Teledıdar kórýdi
armandaǵan aýylym...

Bul sonan soń memlekettik emtıhanyn tapsyrýǵa ketti. Emtıhan ekeý edi. Biri teorıadan, biri ádistemeden. Stýdent óziniń qalaǵan bireýin tapsyrady. Ádistemeni tańdap aldy. Quqyqtyq tárbıe berý ádistemesi. Bular "Zańger-oqytýshy" kvalıfıkasıasymen qabyldanǵan úshinshi túlekter edi. Osymen bul kvalıfıkasıamen maman daıyndaý toqtalady. Kafedra sol kezde endi budan keıin mekteptegi quqyq negizderi páni muǵalimderin daıyndaı bastaǵandyǵy belgili.

"Iýstısıadan maman keledi, muqıat bolyńdar" dedi bularǵa. Biraq maman kútkendegideı, ádilet basqarmasynan emes, sottan keldi. Emtıhandy qalalyq sottyń tóraǵasy qabyldady. Qalalyq sottyń tóraǵasy Ǵanıev emtıhandaǵy jaýabyn "óte jaqsy" dep baǵalady.

Qojabaqylyq komanda da saıysta aýdandyq "Kóńildi kúz" saıysynyń I ornyn enshilegen edi.

---